हिंदी भाषेवरुन निर्माण झालेल्या वादामुळे चर्चेत आलेला किच्चा सुदीप नक्की कोण? जाणून घ्या त्याच्याबद्दल सर्वकाही

दाक्षिणात्य अभिनेता किच्चा सुदीप हा सध्या त्याच्या एका वक्तव्यामुळे चांगलाच चर्चेत आला आहे. 'हिंदी ही आता राष्ट्रभाषा राहिलेली नाही', असे वक्तव्य किच्चा सुदीपने केले. त्याच्या विधानामुळे एक वेगळाच वाद निर्माण झाला. त्याच्या या वक्तव्यानंतर बॉलिवूड अभिनेता अजय देवगणने किच्चा सुदीपवर निशाणा साधला होता. एकीकडे त्याच्यावर टीका होत असली तरी दुसरीकडे टॉलिवूडमधील अनेक कलाकारांनी किच्चा सुदीपचे समर्थन केले होते. या मुद्द्यावरुन सध्या अजय देवगण आणि किच्चा सुदीप यांच्यात ट्विटर वॉर सुरु होते. या संपूर्ण प्रकरणानंतर किच्चा सुदीप नक्की कोण? याची आपण माहिती घेणार आहोत. किच्चा सुदीपचे याचे खरे नाव सुदीप संजीव असे आहे. मात्र सिनेसृष्टीत त्याला सुदीप याच नावाने ओळखले जाते. किच्चा सुदीप हा कन्नड चित्रपटांचा सुपरस्टार मानला जातो. तो कन्नड सिनेसृष्टीतील एक लोकप्रिय दिग्दर्शक, निर्माता आणि सूत्रसंचालकही आहे. किच्चा सुदीपने आतापर्यंत अनेक कन्नड भाषिक चित्रपटांमध्ये काम केले आहे. त्यासोबतच तो तामिळ, तेलुगू आणि हिंदी भाषेतील चित्रपटांमध्येही झळकला आहे. सलमान खानच्या 'दबंग 3', 'फुंक', 'रन', 'फुंक 2', 'रक्तचरित्र 1' आणि 'रक्तचरित्र 2' यांसारख्या अनेक बॉलिवूड चित्रपटात त्याने काम केले आहे. किच्चा सुदीप याचा जन्म कर्नाटकातील शिमोगा येथे झाला. त्यांच्या वडिलांचे नाव संजीव मंजप्पा आणि आईचे नाव सरोजा असे आहे. किच्चाला सिनेसृष्टीत येण्याआधी इंजिनियर व्हायचे होते. त्याने बंगळूरुमधून अभियांत्रिकी शिक्षण पूर्ण केले आहे. पण त्यानंतर त्याला अभिनेता होण्याची इच्छा निर्माण झाली आणि तो मुंबईत आला. त्यानंतर त्याने अभिनय शाळेत प्रवेश घेतला. किच्चा सुदीपने १९९७ मध्ये 'थयव्वा' या कन्नड चित्रपट आपल्या अभिनय कारकिर्दीला सुरुवात केली. अनेक कन्नड चित्रपट केल्यानंतर २००८ मध्ये दिग्दर्शक राम गोपाल वर्माच्या 'फूंक' या चित्रपटाद्वारे त्याने बॉलिवूडमध्ये पदार्पण केले. गेल्या २० वर्षांपासून किच्चा हा सिनेसृष्टीत कार्यरत आहे. लवकरच तो 'विक्रांत राणा' या चित्रपटात झळकणार आहे. २००१ मध्ये प्रदर्शित झालेल्या 'हुच्छा' या चित्रपटामुळे किच्चाला खरी ओळख मिळाली. या चित्रपटामुळे तो घराघरात लोकप्रिय झाला. या चित्रपटानंतरच सुदीपला 'किच्चा' हे टोपणनाव मिळाले. यानंतर त्याने एसएस राजामौली यांच्या 'ईगा' या चित्रपटात नकारात्मक भूमिका साकारली. त्याची ही भूमिकाही प्रचंड गाजली. किच्चा सुदीप हा बॉलिवूड अभिनेता सलमान खानचा खूप चांगला मित्र आहे. 'दबंग ३' या चित्रपटाच्या शूटींगसाठी सलमानकडून एक रुपयाही मानधन आकारले नव्हते, एका मुलाखतीत त्याने याबाबतची माहिती दिली होती. सलमान आणि किच्चाचे कुटुंबिय यांच्यात फार जवळचे आणि घनिष्ठ संबंध आहेत. सलमानने काही वर्षांपूर्वी त्याला दीड कोटींची आलिशान कारही भेट दिली होती. किच्चा सुदीपने हा अभिनेत्यासोबतच उत्तम दिग्दर्शकही आहे. त्याने आतापर्यंत अनेक कन्नड चित्रपटांचे दिग्दर्शनही केले आहे. त्याचे दिग्दर्शन असलेल्या चित्रपटांनी बॉक्स ऑफिसवर चांगली कमाई केली आहे. त्याचे स्वत:चे 'किच्चा प्रॉडक्शन' नावाचे प्रोडक्शन हाऊस देखील आहे. या बॅनरखाली त्याने अनेक चित्रपटाचे दिग्दर्शन केले आहे. त्यासोबत त्याने अनेक टीव्ही शोमध्येही काम केले आहे. कन्नड भाषेतील बिग बॉसचे सूत्रसंचालन तोच करतो. त्यानंतर २०१३ मध्ये किच्चा सुदीपने '३६० डिग्री' नावाची एक इव्हेंट कंपनी देखील सुरू केली होती. किच्चा सुदीपच्या पत्नीचे नाव प्रिया राधाकृष्ण असे आहे. २००१ मध्ये ते दोघे विवाहबद्ध झाले. किच्चा सुदीप आणि पत्नी प्रिया २०१५ मध्ये वेगळे झाले होते. पण त्यानंतर सर्व मतभेद विसरून त्यांनी नवीन सुरुवात केली होती. किच्चा सुदीप हा आता जरी वादात सापडला असेल तर तो अनेक सामाजिक काम ही करतो. या संस्थेद्वारे तो गरीब मुलांना शालेय गणवेशापासून ते शिष्यवृत्तीपर्यंतची सुविधा उपलब्ध करुन देतो. त्याच्या या संस्थेने करोना महामारीच्या काळात कन्नड चित्रपट उद्योगातील ज्येष्ठ कलाकार, तंत्रज्ञ आणि इतरांना खूप मदत केली होती. त्यावेळी त्याने आवश्यक गोष्टींचा पुरवठा केला होता.