“दाक्षिणात्य कलाकारांचाही अहंकार कधीतरी दुखावला गेला असावा त्यामुळेच…”, मकरंद देशपांडेंनी दिले स्पष्टीकरण

नामांकित रंगभूमी कलाकार, दिग्दर्शक आणि चित्रपट अभिनेते मकरंद देशपांडे हे नेहमीच काही ना काही कारणांमुळे चर्चेत असतात. ते सोशल मीडियावर कायमच चर्चेत असतात. काही आठवड्यांपूर्वी प्रदर्शित झालेल्या 'आरआरआर' चित्रपटातही त्यांनी साकारलेल्या भूमिकेचे कौतुक झाले होते. तसेच अभिनेत्री माधुरी दीक्षितसोबत 'द फेम गेम' या वेबसीरिजमध्येही त्यांनी काम केले होते. गेल्या काही दिवसांपासून मकरंद देशपांडे हे 'बलात्कार प्लीज स्टॉप इट' या नवीन नाटकामुळे चर्चेत आहे. हे नाटक बलात्कार याप्रकरणावर भाष्य करणारे आहे. नुकतंच मकरंद देशपांडे यांनी दाक्षिणात्य विरुद्ध बॉलिवूड या वादावरही भाष्य केले आहे. यावेळी मकरंद देशपांडे म्हणाले, "मी गेल्या काही दिवसांपासून दाक्षिणात्य विरुद्ध हिंदी सिनसृष्टी हा वाद बघत आहे. पण कधीतरी त्यांचा अहंकार देखील दुखावला गेला असावा असे मला वाटते." "एक काळ असा होता जेव्हा आपण दाक्षिणात्य कलाकारांबद्दल बोलायचो. त्यांना हिंदी येत नाही, त्यांना कोण पाहणार? पण चित्रपटाबद्दल आणि सिनेसृष्टीबद्दल असलेली मेहनत, कष्ट हे जास्त आहे", असे मकरंद देशपांडे यांनी म्हटले. "आपल्याकडे चित्रपटाचा नायक हा सर्व पैसे घेतो आणि त्या उलट तिकडे ती लोक चित्रपटावर जास्त पैसे खर्च करतात", असेही ते म्हणाले. "आता 'बाहुबली', 'आरआरआर' आणि 'केजीएफ चॅप्टर 2' यानंतर बॉलिवूडमध्ये दाक्षिणात्य कलाकारांना विचारण्यात आले नाही, तर त्यांना काहीही फरक पडत नाही", असेही त्यांनी सांगितले. "ते आता त्यांचे चित्रपट डब करु शकतात आणि जागतिक पातळीवरचे प्रेक्षक ते बघतो", असेही त्यांनी म्हटले "येत्या काही दिवसांत आता अनेक दाक्षिणात्य चित्रपटांचे कलाकार हे बॉलिवूड चित्रपटातही झळकताना दिसतील", असेही मकरंद देशपांडे यांनी म्हटले. (सर्व फोटो - मकरंद देशपांडे/ इन्स्टाग्राम)