Photos: धनश्री काडगावकर पुन्हा एकदा दिसणार नकारात्मक भूमिकेत ‘या’ मालिकेत करणार काम

झी मराठीवरील 'तुझ्यात जीव रंगला' मधील 'वहिनीसाहेब' ही व्यक्तिरेखा अजूनही प्रेक्षक विसरलेले नाहीत. 'वहिनीसाहेबा'चा धाक आणि दरारा आजही प्रेक्षकांच्या लक्षात आहे. 'वहिनीसाहेब' ही भूमिका साकारणारी अभिनेत्री धनश्री काडगावकर झी मराठीवरील 'तू चाल पुढं' या मालिकेत पुन्हा एकदा नकारात्मक भूमिका साकारताना दिसणार आहे. या मालिकेची गोष्ट आहे एका गृहिणीने पाहिलेल्या मोठ्या स्वप्नांची. नुकतंच या मालिकेचा प्रोमो रिलीज झाला असून ही मालिका १५ ऑगस्ट पासून संध्याकाळी ७.३० वाजता प्रेक्षकांच्या भेटीला येणार आहे. या मालिकेतील आपल्या भूमिकेबद्दल बोलताना धनश्री म्हणाली, या मालिकेत माझ्या व्यक्तिरेखेचं नाव शिल्पी आहे. शिल्पी तिच्या माहेरी येऊन राहतेय आणि तिला सतत असं वाटतं की तिच्या आयुष्यात जे काही चुकीचं घडलं त्याला कारणीभूत फक्त आणि फक्त अश्विनी आहे. त्यामुळे शिल्पी अश्विनीला सतत घालून पाडून बोलते, प्रत्येक गोष्टींमध्ये तिच्या चुका काढते जस प्रोमोमध्ये देखील प्रेक्षकांनी पाहिलं की शिल्पी कशी तिच्या वहिनी अश्विनीला टोमणे मारते. अशा प्रकारची एक नकारात्मक भूमिका पुन्हा एकदा मी साकारतेय. त्यामुळे जशी वहिनीसाहेब सगळ्यांच्या लक्षात राहिली तशीच शिल्पी देखील प्रेक्षकांच्या मनात घर करेल अशी मी आशा करते. (सर्व फोटो सौजन्य : धनश्री काडगावकर / इन्स्टाग्राम) (हेही पाहा : छोट्या पडद्यावरील ‘हे’ मराठी कलाकार लवकरच करणार बॉलिवूडमध्ये दमदार पदार्पण)