‘बर्फी’ चित्रपटामुळे संजय दत्तने उडवली होती रणबीर कपूरची खिल्ली, म्हणाला “वाईट चित्रपटांची…”

बॉलिवूड अभिनेता रणबीर कपूर आणि संजय दत्त लोकप्रिय अभिनेते आहेत. या दोघांमध्ये एक खास बॉन्डिंग आहे. रणबीर कपूर आणि संजय दत्त या दोघांचा ‘शमशेरा’ हा चित्रपट लवकरच प्रेक्षकांच्या भेटीला येत आहे. रणबीर कपूरने याआधी संजय दत्तचा बायोपिक ‘संजू’मध्ये मुख्य भूमिका साकारली होती. या चित्रपटामुळे रणबीरच्या करिअरला वेगळीच कलाटणी मिळाली. राज कुमार हिरानी दिग्दर्शित ‘संजू’मध्ये संजय दत्तच्या आयुष्यात चांगल्या आणि वाईट दोन्ही बाजू मांडण्यात आल्या होत्या. रणबीरने ही भूमिका फार उत्तम पद्धतीने साकारली होती. या भूमिकेबद्दल त्याचे फार कौतुकही झाले. रणबीर हा सध्या त्याचा आगामी शमशेरा चित्रपटाच्या प्रमोशनमध्ये व्यस्त आहे. पण या दरम्यान त्याने संजय दत्तसोबतच्या बॉन्डिंगबद्दल खुलासा केला आहे. "माझे आणि संजय दत्तचे नाते फारच खास आहे. २०१२ मध्ये मी बर्फी या चित्रपटात काम करत होतो, त्यावेळी ते माझ्यावर फार चिडले होते." संजय दत्तसोबतचा किस्सा सांगताना रणबीर म्हणाला, "जेव्हा मी बर्फी आणि रॉकस्टार या चित्रपटात काम करत होतो, त्यावेळी मी संजय दत्त यांच्या जिममध्ये वर्कआऊट करायचो." त्यावेळी तो मला म्हणाला, "तू इथे गेल्या दोन वर्षांपासून जिम करतोस. पण तुझ्या बॉडीमध्ये काही फरक होताना मला तरी दिसत नाही." "तू सध्या बर्फी चित्रपटात काम करतोस. मग तुझ्या आगामी चित्रपटाचे नाव काय असणार? पेढा की लाडू?", असा शब्दात त्यांनी माझी खिल्लीही उडवली होता. "त्यावेळी मला फार राग आला होता. पण त्यानंतर त्याने मला नीट समजावले. तसेच वाईट चित्रपटांची निवड न करता चांगल्या चित्रपटांची निवड करण्याचा सल्ला दिला होता." संजय दत्त हा माझ्यासाठी नेहमीच एक आधार आणि प्रेरणा देणारा व्यक्ती आहे. तो माझ्या वडिलांप्रमाणे आहे. "त्याने नेहमी माझ्या पाठीवर कौतुकाची थाप दिली आहे. मी आतापर्यंत जे काही केले आहे, त्याचा त्याला खूप आनंद आणि अभिमान वाटतो", असेही रणबीरने यावेळी सांगितले. "संजय दत्तने मला नेहमीच वेगवेगळे चित्रपट करण्यास आणि प्रेक्षकांना विचार करण्यास भाग पाडणारे चित्रपट करण्यास प्रेरणा दिली आहे", असेही त्याने म्हटले. "मला संजू सरांसारखा वडील मिळाल्याचा खूप आनंद झाला आहे", असेही रणबीर म्हणाला. दरम्यान रणबीर कपूर त्याचा आगामी चित्रपट ‘शमशेरा’मध्ये पहिल्यांदाच दुहेरी भूमिकेत दिसणार आहे. तो या चित्रपट वडील आणि मुलगा अशा दोन्ही भूमिका साकारताना दिसणार आहे. या चित्रपटात संजय दत्त आणि रणबीर कपूर यांच्या व्यतिरिक्त वाणी कपूर, आशुतोष राणा, सौरभ शुक्ला, रोनित रॉय, त्रिधा चौधरी आणि पितोबाश त्रिपाठी यांच्या महत्त्वपूर्ण भूमिका आहेत. करण मल्होत्रा दिग्दर्शित हा चित्रपट येत्या २२ जुलैला हिंदी, तमिळ आणि तेलुगू या भाषांमध्ये प्रदर्शित होणार आहे.