Photos: ‘महाराष्ट्राची हास्यजत्रा’ फेम अभिनेत्री विशाखा सुभेदारची ‘या’ लोकप्रिय मालिकेत एण्ट्री

आपल्या विनोदबुद्धीच्या जोरावर महाराष्ट्राला खळखळून हसवणारी अभिनेत्री म्हणजे विशाखा सुभेदार. 'महाराष्ट्राची हास्यजत्रा' या कार्यक्रमातून विशाखा घराघरात पोहोचली. काही दिवसांपूर्वी या कार्यक्रमातून विशाखाने विश्रांती घेण्याचा निर्णय घेतला. परंतु, आता लवकरच प्रेक्षकांचे मनोरंजन करण्यासाठी विशाखा पुन्हा एकदा सज्ज झाली आहे. स्टार प्रवाहवरील 'ठिपक्यांची रांगोळी' या मालिकेतून ती प्रेक्षकांच्या भेटीला येणार आहे. या मालिकेचे कथानक अतिशय उत्कंठावर्धक वळणावर येऊन पोहोचले आहे. अप्पू आणि शशांकने घटस्फोट घेण्याचा निर्णय घेतला आहे. संपूर्ण कानेटकर फॅमिली अपूर्वा शशांकचा घटस्फोट थांबवण्यासाठी प्रयत्न करत असताना आता मालिकेत एका नव्या पात्राची एण्ट्री होणार आहे. दमयंती दुधखुळे असे या पात्राचे नाव असून ती विवाह सल्लागार असेल. अभिनेत्री विशाखा सुभेदार दमयंती दुधखुळे ही व्यक्तिरेखा साकारणार आहे. 'ठिपक्यांची रांगोळी' मधील या भूमिकेविषयी सांगताना विशाखा सुभेदार म्हणाल्या, मालिकेच्या नावाप्रमाणेच या मालिकेत मी एक छोटासा ठिपका असेन जो शशांक आणि अपूर्वाच्या नात्यात प्रेमाचे रंग भरण्याचा प्रयत्न करणार आहे. दमयंती दुधखुळे नावावरुनच ही व्यक्तिरेखा विनोदी असेल याचा अंदाज येतो. अतिशय भन्नाट व्यक्तिरेखा आहे. अप्पू-शशांकला एकत्र आणण्याच्या प्रयत्नात ती तिच्या आयुष्यातील गुंताही सोडवते. त्यामुळे प्रेक्षकांना ही भूमिका नक्कीच आवडेल. (सर्व फोटो सौजन्य - विशाखा सुभेदार / इन्स्टाग्राम)