जेव्हा गोऱ्या रंगामुळे करिअर लागलं होतं पणाला, अभिनेत्रीने सांगितला धक्कादायक अनुभव

सावळ्या रंगामुळे अनेक कलाकारांना भूमिका नाकारण्यात आल्याचं आपल्या नेहमीच ऐकिवात असतं. पण गोऱ्या रंगामुळे करिअर पणाला लागण्याचा अनुभव एका अभिनेत्रीला आला आहे. पाकिस्तानी अभिनेत्री मोमिना इकबालने काही दिवसांपूर्वीच तिच्या करिअरबद्दल बोलताना धक्कादायक खुलासा केला आहे. खूप जास्त गोऱ्या रंगाच्या त्वचेमुळे मोमिनाला करिअरच्या सुरुवातील अनेक भूमिका नाकारण्यात आल्या आहेत. एका मुलाखतीत मोमिनाने सांगितलं, "माझे सहकलाकार कोणत्याच अँगलमधून माझ्यासह स्क्रीनवर दिसणं पसंत करत नव्हते." "ऑनस्क्रीन माझा हात पकडण्यातही त्यांना समस्या होती कारण माझ्या नितळ त्वचेमुळे त्यांची त्वचा टॅन दिसेल अशी भीती त्यांना वाटायची" असंही मोमिना म्हणाली. या मुलाखतीत ती पुढे म्हणाली, "माझ्यासह काम करणारे अभिनेतेच नाही तर अभिनेत्रीही माझ्या रंगामुळे मला ऑनस्क्रीन हात लावण्यास नकार द्यायच्या." एवढंच नाही तर मोमिनाला करिअरच्या सुरुवातील सौंदर्यामुळे भूमिका मिळतात अशा आशयाचे टोमणेही ऐकावे लागले होते. मोमिना म्हणते, "या सर्व गोष्टींचा मला खूप त्रास झाला होता. पण आता इंडस्ट्रीमधील परिस्थिती पूर्वीसारखी राहिलेली नाही." मोमिनाने 'अजनबी लगे जिंदगी', 'इश्क में काफिर', 'खुदा और मोहब्बत सीजन 3', 'मेरे हमनशीं' या मालिकांमध्ये काम केलं आहे. मोमिना इकबालने तिच्या करिअरची सुरुवात 'पार्लरवाली लडकी' या टीव्ही मालिकेतून केली होती. (फोटो साभार- मोमिना इकबाल इन्स्टाग्राम)