Photos: प्रेक्षकांचा ‘थॅंक गॉड’वरील राग निवळणार?, चित्रपटात करण्यात येणार ‘हे’ मोठे बदल

अजय देवगणचा आगामी चित्रपट ‘थँक गॉड' गेले काही दिवस वादाच्या भोवऱ्यात अडकला आहे. या चित्रपटात दाखवलेल्या काही प्रसंगांवर अनेकांनी आक्षेप घेत या चित्रपटाबद्दल तक्रार केली. या आगामी चित्रपट ‘थँक गॉड’मध्ये तो चित्रगुप्ताची भूमिका साकारताना दिसणार आहे. पण या भूमिकेमुळे तो अडचणीत आला आहे. तसेच या चित्रपटात अजय देवगणसह सिद्धार्थ मल्होत्रा आणि राकुल प्रीतची महत्त्वपूर्ण भूमिका आहेत. इंद्र कुमार दिग्दर्शित 'थँक गॉड' या चित्रपटाला शुक्रवारी सेंट्रल बोर्ड ऑफ फिल्म सर्टिफिकेशन (CBFC) कडून U/A प्रमाणपत्र मिळाले आहे. पण सेन्सॉर बोर्डाने चित्रपटाच्या निर्मात्यांना या चित्रपटात काही बदल सुचवले आहेत. त्यानुसार चित्रपटाच्या रिलीजच्या तीन दिवस आधी या चित्रपटात काही महत्वाचे बदल करण्यात येणार आहेत. या चित्रपटातील एका फ्रेममध्ये दारूच्या ब्रँडचा लोगो स्पष्ट दिसत होता. हा लोगो ब्लर करण्यात येणार आहे. चित्रपटाच्या सुरुवातीला लिहिलेल्या प्रस्ताविकाच्या मजकूरतही बदल करण्यात येणार आहे. त्यासोबत हे प्रस्ताविक प्रेक्षकांना नीट वाचता यावे यासाठी या प्रस्ताविकाचा स्क्रीन टाईमही वाढवण्यात येणार आहे. इतकेच नव्हे तर, चित्रगुप्त या भूमिकेचे नाव बदलून 'सीजी', तर यमदूत या व्यक्तीरेखेचे नाव बदलून 'वायडी' असे करण्यात येणार आहे. हा चित्रपट ठरलेल्या दिवशी, म्हणजेच २५ ऑक्टोबर रोजी प्रदर्शित करण्यात येणार आहे.