“…म्हणून मी लेकीचा पहिला वाढदिवस साजरा करण्यास दिलेला नकार” काजोलने उघड केले गुपित

बॉलिवूड अभिनेता अजय देवगण आणि काजोलची मुलगी न्यासा देवगण ही कायमच चर्चेत असते. ती सोशल मीडियावर नेहमी सक्रीय असल्याचे पाहायला मिळते. ती अनेकदा तिचे व्हिडीओ आणि फोटो शेअर करताना दिसते. तिचे हे सर्व फोटो चर्चेचा विषय ठरताना दिसतात. अजय देवगण आणि काजोल यांची मुलगी न्यासा देवगणने अद्याप बॉलिवूडमध्ये पदार्पण केलेले नाही. न्यासा ही बॉलिवूडमध्ये फारशी सक्रीय नसली तरी तिचा चाहता वर्ग प्रचंड आहे. नुकतंच न्यासाची आई काजोलने तिच्या जन्मानंतरच्या पहिल्या वाढदिवसाचा एक किस्सा सांगितला आहे. काजोल आणि अजयने न्यासाचा पहिला वाढदिवस साजराच केला नाही, असे तिने एका मुलाखतीत सांगितले. “लेकीच्या जन्मानंतर मी धास्तावलेले होते. आईच्या मनात आपल्या बाळाविषयी, त्याच्या सुरक्षतेविषयी नेहमी एक प्रकारची चिंता असते.” “बाळाचे आरंभीचे १२ महिने कठीण असतात. बाळ रात्रभर रडतं, वेळी-अवेळी झोपतं. कधी बाळाला उलट्या होतात, त्याचं वाढणारं बाळसं आईची झोप उडवतं.” “मातृत्वाचा आनंद म्हणायला ठीक आहे पण मी न्यासाच्या वेळी खरंच घाबरलेली होते.” “मला अजयने, आईने आणि इतर कुटुंबाने तिचा पहिला वाढदिवस कसा साजरा करायचा” असा प्रश्न विचारला होता. “पण मी तिचा पहिला वाढदिवस साजरा करायला नकार दिला. आम्ही तो सेलिब्रेट केला नाही.” “त्यादिवशी आम्ही एका रेस्टॉरंटमध्ये जाऊन आलो. काही किरकोळ वस्तू घेतल्या आणि घरी आलो.” “त्यानंतर जेव्हा तिला कळायला लागल्यावर आम्ही तिचे वाढदिवस थाटामाटात करायला सुरुवात केली”, असे काजोलने सांगितले. दरम्यान न्यासा ही लोकप्रिय स्टार किड्समध्ये गणली जाते. ती लवकरच बॉलिवूडमध्ये पदार्पण करणार असल्याचे बोललं जात आहे. मात्र अद्याप याबद्दल कोणतीही माहिती समोर आलेली नाही.