मसाबा गुप्ताने अदिती राव हैदरीच्या पहिल्या पतीशी केलंय दुसरं लग्न; जाणून घ्या कोण आहे सत्यदीप मिश्रा

अभिनेत्री व फॅशन डिझायनर मसाबा गुप्ता ही नीना गुप्ता आणि विवियन रिचर्ड्स यांची मुलगी आहे. दोघांनी लग्न न करताच लेक मसाबाचा जन्म झाला होता. नीना गुप्ता यांनी एकल माता म्हणून मसाबाला वाढवलं. मसाबा बॉलिवूडमधील सुप्रसिद्ध फॅशन डिझायनर व अभिनेत्री आहे. तिने आईबरोबर मसाबा मसाबा या रिअल लाइफ वेब सीरिजमध्येही काम केलंय. मसाबा सध्या तिच्या दुसऱ्या लग्नामुळे चर्चेत आहे. तिने तिचा बॉयफ्रेंड, अभिनेता सत्यदीप मिश्राशी लग्न केलंय. मसाबाने काही फोटो शेअर करत तिच्या लग्नाबद्दल माहिती दिली. “आज मी माझ्या प्रेमासह लग्न केले आहे, येणारे आयुष्य प्रेम, शांती, स्थैर्य व सर्वात महत्त्वाचं म्हणजे चेहऱ्यावर हसू घेऊन येईल. आपलं आयुष्य मस्त असणार आहे. आणि तू मला कॅप्शन लिहायला दिलंस यासाठी आभार” असं तिने पोस्ट शेअर करत म्हटलंय. मसाबाच्या लग्नाचे फोटो व्हायरल झाल्यानंतर तिचा पती सत्यदीप मिश्रा कोण आहे, याबद्दल चर्चा सुरू झाल्या आहेत. मसाबाचा पती सत्यदीप मिश्रा हा बॉलिवूड अभिनेता आहे. त्याने अनेक चित्रपटांमध्ये काम केलंय. सत्यदीप ४० वर्षांचा असून त्याचं मसाबाशी दुसरं लग्न आहे. त्याचं पहिलं लग्न अभिनेत्री अदिती राव हैदरीशी झालं होतं. दोघांनी २००९ मध्ये लग्न केलं होतं. पण, लग्नाच्या ४ वर्षांनी त्यांचा घटस्फोट झाला होता. अदितीशी घटस्फोट घेतल्यानंतर सत्यदीपने काही बॉलिवूड चित्रपटांमध्ये काम केलं होतं. त्याने नो वन किल्ड जेसिका चित्रपटातून बॉलिवूडमध्ये पदार्पण केलं होतं. सत्यदीपला फिरायची खूप आवड आहे, तो बाईक ट्रीपवर जात असतो. त्याने 'हिज स्टोरी', 'मुखबीर', 'काली खुही', 'फोबिया' अशा चित्रपट व सीरिजमध्ये काम केलंय. 'मसाबा मसाबा'च्या सेटवर त्याची मसाबा गुप्ताबरोबर भेट झाली आणि ते दोघे एकमेकांना डेट करू लागले. त्यानंतर आज त्यांनी कुटुंबीयांच्या उपस्थितीत लग्न केलं. सत्यदीप व मसाबाच्या लग्नाला तिचे वडील विवियन रिचर्ड्स यांनीही हजेरी लावली. (सर्व फोटो - मसाबा गुप्ताचे इन्स्टाग्राम व इंडियन एक्सप्रेसवरून साभार)