“मला मेकअपच…” केतकी माटेगांवकरने सांगितला ‘तो’ किस्सा

अभिनेत्री आणि गायिका केतकी माटेगांवकरचा आज वाढदिवस. अभिनय, गायन यांच्याबरोबरच सौंदर्याच्या जोरावर केतकीने अनेकांच्या मनावर राज्य केलं. ती सोशल मीडियावर कायमच सक्रीय असते. आपल्या सुमधूर सुरांनी तरुणाईला मोहून टाकणाऱ्या आघाडीच्या गायकांपैकी एक म्हणून तिला ओळखले जाते. केतकीने वयाच्या चौथ्या वर्षापासून संगीतक्षेत्रात पदार्पण केलं. गायिका असण्याबरोबरच केतकी एक उत्तम मराठी अभिनेत्री सुद्धा आहे. कोवळ्या वयातील प्रेमभावनांचा प्रवास उलगडणाऱ्या ‘शाळा’ या चित्रपटातून केतकीने सिनेसृष्टीत पदार्पण केले. केतकी माटेगावंकरला २०१२ मध्ये 'काकस्पर्श' या चित्रपटातील भूमिकेसाठी इंटरनॅशनल फिल्म ॲण्ड थिएटरचा सर्वोत्कृष्ट अभिनेत्रीचा पुरस्कार मिळाला. बिकट परिस्थितीत शाळकरी मुलीपासून ते कलेक्टर झालेल्या तरुणीच्या प्रवासाची कथा सांगणाऱ्या 'तानी' या चित्रपटातही ती झळकली आहे. गायन आणि अभिनय क्षेत्रात यश मिळवल्यानंतर संगीतकार म्हणूनही केतकी सातत्याने चर्चेत असते. काही दिवसांपूर्वी दिलेल्या एका मुलाखतीत केतकीने लहानपणीचा एक किस्सा सांगितला होता. यात तिने मेकअपबद्दलचा मोठा खुलासा केला होता. "मी साधारण पाच-सहा वर्षांची असताना सूर-तालमध्ये तीन गाणी गायले होते." "अगदीच लहान होते, त्यामुळे कॅमेरासमोर जायचं टेन्शन वगैरे असं काही नव्हतंच." "सेटवर सगळ्या गायकांना मेकअप चालू होता." "माझ्या आईला मेकअप झाला, बाकी गायकांना झाला." "पण मला मेकअपच केला नाही. त्यामुळे मी खूप रागावले." "सगळ्यांना मेकअप केला, मग मला का केला नाही?’ असं मी त्यावेळी विचारलं." "त्यावर ‘तू लहान आहेस, तुला कशाला मेकअप?’ असं उत्तर मिळालं." "मग काय झालं? असं विचारत मी रडून खूप गोंधळ घातला." "त्यानंतर शेवटी मलाही मेकअप करण्यात आला", असा किस्सा तिने सांगितला.