‘तुझं नेमकं वय किती?’ शिव ठाकरे म्हणाला, “माझं वय…”

‘बिग बॉस १६’ च्या घरात मराठमोळ्या शिव ठाकरेची सर्वाधिक चर्चा रंगताना दिसली. शिव ठाकरे हा बिग बॉसच्या ट्रॉफीपासून अवघं एक पाऊल दूर राहिला. त्याला दुसऱ्या क्रमांकावर समाधान मानावं लागलं. पण शिव ठाकरेने प्रेक्षकांच्या मनामध्ये मात्र घर केलं. बॉलिवूडसह अनेक मराठी कलाकारही शिव ठाकरेचे कौतुक करताना पाहायला मिळाले. बिग बॉसमुळे शिव ठाकरे घराघरात पोहोचला. त्यामुळे फक्त मराठी सिनेसृष्टीत नव्हे तर घराघरात शिव ठाकरे हे नाव आता लोकप्रिय झाले आहे. शिव ठाकरेने ‘रोडीज’, ‘बिग बॉस मराठी’ आणि 'बिग बॉस हिंदी' असे अनेक रिअॅलिटी शो केले आहेत. बिग बॉस १६ च्या घरातून बाहेर आल्यानंतर शिव ठाकरे हा विविध मुलाखत देताना दिसत आहे. नुकतंच एका मुलाखतीत शिव ठाकरेने त्याच्या वयाबद्दल खुलासा केला आहे. 'शिव ठाकरेचे नेमकं वय किती आहे?' असा प्रश्न त्याला एका मुलाखतीत विचारण्यात आला होता. त्यावर त्याने फारच गंमतीशीर उत्तर दिले. "जे वय स्वप्नासाठी बरोबर असतं." "तसेच मेहनत करण्यासाठी अगदी बरोबर असतं, तेच माझं वय आहे", असे शिव ठाकरे म्हणाला. दरम्यान शिव ठाकरेचा जन्म ९ सप्टेंबर १९८९ मध्ये अमरावतीत झाला. सध्या तो ३३ वर्षांचा आहे.