कांचन देशमुख यांची अरुंधती-आशुतोषच्या लग्नाला परवानगी? पाहा, विवाहसोहळ्याचे Unseen Photos

स्टार प्रवाह वाहिनीवरील ‘आई कुठे काय करते’ या मालिकेवर प्रेक्षक भरभरून प्रेम करतात. अल्पावधीतच या मालिकेने लोकप्रियतेचं शिखर गाठलं. मालिकेतील पात्रांनीही प्रेक्षकांच्या मनात घर केलं. गेल्या तीन वर्षांपासून ही मालिका प्रेक्षकांचं मनोरंजन करत असून या मालिकेत नवनवीन ट्विस्ट पाहायला मिळत आहेत. आता लवकरच अरुंधती आणि आशुतोष लग्नबंधनात अडकणार आहेत. अरूंधतीने आशुतोषबरोबर लग्न करण्याचा निर्णय देशमुखांना सांगितल्यानंतर या निर्णयाला कांचन देशमुख, अनिरुद्ध आणि अभिषेक यांनी विरोध केला. मात्र यश आणि आप्पांच्या पाठिंब्यामुळे अरुंधतीच्या आयुष्यात चांगले बदल होणार आहेत. अरुंधतीला मुलीच्या मायेने जपणाऱ्या आप्पांनी अरुंधतीची पाठवणी देशमुखांच्या घरातूनच होणार असं ठामपणे सांगितलं. त्यामुळेच अरुंधतीची हळद, मेहंदी आणि विवाह देशमुखांच्या घरातच होणार आहे. अनिरुद्धपासून वेगळं झाल्यानंतर अरुंधतीने नव्या उमेदीने आयुष्याला सुरुवात केली. आपला आवाज आणि मेहनत याच्या जोरावर तिने अल्पावधीतच प्रसिद्धी मिळवली. यामध्ये तिला आशुतोष केळकरचीही खूप मदत झाली. याच प्रवासात अरुंधती आशुतोषच्या प्रेमात पडली आणि तिने आशुतोषबरोबर लग्न करण्याचा निर्णय घेतला. लवकरच अरूंधतीच्या आयुष्यात नवा अध्याय सुरू होणार आहे. अरुंधती आणि आशुतोषच्या लग्नातील फोटो सध्या व्हायरल होत आहेत. यामध्ये आपण अरुंधती आणि आशुतोषला वर आणि वधूच्या वेशात पाहू शकतो. या लग्नासाठी अरुंधतीने भगव्या रंगाची साडी नेसली असून त्यावर गडद निळ्या रंगाची शाल घेतली आहे. तर आशुतोषने क्रीम कलरची शेरवणी आणि त्यावर काळ्या रंगाचा व्हेलवेटची शाल घेतली आहे. देशमुखांच्या समृद्धी बंगल्यात हा विवाहसोहळा पार पडणार आहे. यावेळी अरूंधतीच्या लग्नाला तीव्र विरोध करणाऱ्या कांचन देशमुख तिला मिठी मारून रडताना दिसतील. घरच्या घरीच मात्र अतिशय थाटामाटात पार पडणार आहे. यावेळी सगळे कार्यक्रम अतिशय उत्साहात पार पडतील. यानंतर अरुंधतीचं देशमुखांबरोबरचं नातं कसं असेल, आशुतोष आणि अरूंधतीच्या नात्यावर याचा परिणाम काय होणार, केळकर आणि देशमुख या दोन कुटुंबामधील समतोल अरुंधती कसा राखणार हे पाहणं महत्त्वाचं ठरणार आहे. सर्व फोटो : स्टार प्रवाह