आकाश ठोसर लग्नासाठी तयार, एकमेव अट सांगत म्हणाला “त्या मुलीला फक्त…”

दिग्दर्शक नागराज मंजुळे यांच्या ‘सैराट’ या चित्रपटामुळे प्रसिद्धीझोतात आलेला अभिनेता म्हणून आकाश ठोसरकडे पाहिले जाते. आकाश ठोसरने 'सैराट' या चित्रपटात 'परश्या' ही भूमिका साकारली होती. आकाश ठोसर हा लवकरच 'घर, बंदूक, बिरयानी' या चित्रपटात झळकणार आहे. या चित्रपटाचे दिग्दर्शन नागराज मंजुळे यांनी केले आहे. त्यातच आता आकाश ठोसरच्या लग्नाची जोरदार चर्चा रंगली आहे. गेल्या काही दिवसांपासून आकाश ठोसर हा विवाहबंधनात अडकणार असल्याचेही बोललं जात आहे. नुकतंच 'लोकसत्ता डिजीटल अड्डा'ला दिलेल्या मुलाखतीत आकाशने त्याच्या ड्रीम गर्लबद्दल सांगितले. यावेळी आकाशने त्याला लग्नासाठी कशी मुलगी हवी आहे? याबद्दलही भाष्य केले. "मला लग्नासाठी अशी मुलगी हवी आहे जिला बिरयानी खूप छान बनवता येईल." "मला तिच्याशी लग्न करायला नक्की आवडेल." "कारण ज्या मुलीला बिरयानी बनवता येते, तिला कुठलाही स्वयंपाक बनवता येऊ शकतो." "मला अजून तरी अशी कोणीही मुलगी मिळालेली नाही", असे आकाश यावेळी म्हणाला. आकाशचे हे उत्तर ऐकून नागराज मंजुळेंनी त्याची मस्करी केली. "आकाश उगाचच काहीही सांगू नकोस, उद्या अनेक मुली घरी बिरयानी घेऊन येतील", असे नागराज मंजुळे म्हणाले. त्यावर आकाशने "त्यांना प्रमोशन सुरु आहे, हे कळेल ना?" असे म्हटलं. दरम्यान आकाश ठोसर हा लवकरच ‘घर बंदूक बिरयानी’ या चित्रपटात झळकणार आहे. येत्या ७ एप्रिल रोजी हा चित्रपट प्रेक्षकांच्या भेटीस येणार आहे. सयाजी शिंदे, नागराज मंजुळे आणि आकाश ठोसर यांच्या या चित्रपटात प्रमुख भूमिका आहेत.