तब्बल पाच वर्षांनंतर मीरा जोशीचं मालिकाविश्वात पुनरागमन; शरद पोंक्षेंबरोबरचे फोटो व्हायरल

‘तुझं माझं ब्रेकअप’ या मालिकेतून घराघरात पोहोचलेली अभिनेत्री मीरा जोशी पुन्हा एकदा प्रेक्षकांचं मनोरंजन करण्यासाठी सज्ज झाली आहे. तब्बल पाच वर्षांनंतर मीराचे पुन्हा एकदा मालिकाविश्वात पुनरागमन होत आहे. मीरा उत्तम अभिनेत्री तर आहेच, पण ती उत्कृष्ट नृत्यांगणा आहे. तिने मालिका, चित्रपटांबरोबर काही रिअॅलिटी शो देखील केले आहेत. तसेच तिची एक माहित नसलेली बाजू म्हणजे तिनं डबिंग क्षेत्रातही काम केलं आहे. बॉलीवूडमधल्या ‘पानिपत’ चित्रपटातील अभिनेत्री क्रिती सेनॉनचा मराठीतला आवाज मीराने दिला आहे. अशी ही सर्वगुण संपन्न अभिनेत्री आता 'झी मराठी'वरील लोकप्रिय मालिकेतून प्रेक्षकांच्या भेटीस आली आहे. ‘दार उघड बये’ या मालिकेत मीराला पाहता येणार आहे. 'चंपा' असं तिच्या नव्या भूमिकेच नाव आहे. नुकतेच तिने या मालिकेतल्या भूमिकेतील काही फोटो शेअर केले आहे. या फोटोंमध्ये मराठी सिनेसृष्टीतील लोकप्रिय अभिनेते शरद पोंक्षेंबरोबर ती काम करताना दिसत आहे. मीरा आणि शरद पोंक्षेंचे हे फोटो सोशल मीडियावर चांगलेच चर्चेत आले आहेत.