Photos: आमिर खानच्या लेकीचं पहिलं केळवण! आयरा खान-नुपूर शिखरेचा अस्सल मराठमोळा अंदाज, विहीणबाईंचा वेगळाच थाट

अभिनेता आमिर खानची लेक आयरा खान लग्नबंधनात अडकणार आहे. आयरा व नुपूर शिखरे यांनी १८ नोव्हेंबर २०२२ रोजी साखरपुडा केला होता. आता वर्षभराने दोघेही लग्नबंधनात अडकतील. आयरा व नुपूर ३ जानेवारीला लग्न करणार आहेत. आमिरच्या लेकीच्या लग्नाची तयारी सुरू झाली आहे. आयरा व मराठमोळा नुपूर शिखरे यांच्या केळवणाचे पहिले फोटो समोर आले आहेत. खुद्द आयरानेच या पारंपारिक केळवणाचे फोटो तिच्या इन्स्टाग्रामवर शेअर केले आहेत. फोटोमध्ये आयरा व नुपूरची ओवाळणी करण्यात आली. आयरा व नुपूरच्या केळवणासाठी त्यांचे मित्र व मैत्रिणी आल्या होत्या. यावेळी नुपूरने कुर्ता घातला होता. तर आयराने साडी नेसली व नाकात नथ घातली होती. मिथिली पालकर देखील याठिकाणी हजर होती. नुपूर व आयरा यांच्या केळवणातील फोटोंची जोरदार चर्चा आहे. इतकंच नाही तर यावेळी आयराने नुपूरसाठी उखाणाही घेतला. "मला मराठी येत नाही, पण पपोयसाठी मी कधी नाही म्हणत नाही," असा उखाणा तिने नुपूरसाठी घेतला. नुपूरला सगळे पपोय नावाने हाक मारतात. या केळवणाच्या फोटोंवर चाहते लाइक्स व कमेंट्सचा वर्षाव करत आहेत. आयरा व नुपूरच्या केळवणात दोघांच्या आईंनीही फोटो काढले. आयराची आई रीना दत्ता साडीत खूप सुंदर दिसत होत्या. तर, नुपूरची आई प्रीतम शिखरे यांनी कुर्ता घातला होता. (सर्व फोटो - आयरा खानच्या इन्स्टाग्रामवरून साभार)