ताजमध्ये वेटर, १४ वर्षे बेकरीत केलं काम अन् ४४ व्या वर्षी बॉलीवूड पदार्पण; जाणून घ्या बोमन इराणींची एकूण संपत्ती

बोमन इराणी त्यांच्या कॉमिक टायमिंगसाठी ओळखले जातात. त्यांनी त्यांच्या संपूर्ण कारकिर्दीत अशी अनेक व्यक्तिरेखा साकारल्या आहेत, ज्यांची आजही चर्चा होते. पण तुम्हाला माहीत आहे का की आपल्या अभिनयाने लोकांच्या हृदयात स्थान निर्माण करणाऱ्या बोमन यांना लहानपणी डिस्लेक्सियाचा सामना करावा लागला आहे. याशिवाय ते शाळेत तोतरं बोलायचे, त्यामुळे त्यांची खिल्ली उडवली जायची. याचा खुलासा खुद्द बोमन इराणींनी 'कौन बनेगा करोडपती १२' या शोमध्ये केला होता. बोमन सहा महिन्यांचे असताना त्यांच्या वडिलांचे निधन झाले होते. आपल्या आईच्या मदतीने बोमन त्यांच्या समस्येवर मात करण्यात यशस्वी झाले. शालेय शिक्षण पूर्ण केल्यानंतर बोमन यांनी मिठीबाई कॉलेजमध्ये २ वर्षांचा वेटर कोर्स केला आणि त्यानंतर दोन वर्षे ताज हॉटेलमध्ये वेटर म्हणून काम केले. ताज हॉटेलमध्ये काम करण्यासोबतच त्यांनी फोटोग्राफीमध्येही हात आजमावला. मात्र आई आजारी पडल्यानंतर ते आईच्या बेकरीमध्ये काम करू लागले. १४ वर्षे बेकरीमध्ये काम केल्यानंतर त्यांची भेट कोरिओग्राफर श्यामक दावर यांच्याशी झाली. त्यांनीच बोमनला थिएटरमध्ये काम करण्याचा सल्ला दिला होता. थिएटरमध्ये काम करण्यासोबतच बोमन यांनी अनेक जाहिरातींसाठी ऑडिशनही दिल्या. १८० हून अधिक जाहिरातींमध्ये काम केल्यानंतर बोमन यांना शॉर्ट फिल्म्सच्या ऑफरही येऊ लागल्या. बोमन ४१ वर्षांचे असताना त्यांना 'एव्हरीबडी सेज आय एम फाइन' हा पहिला भारतीय इंग्रजी चित्रपट मिळाला. वयाच्या ४४ व्या वर्षी बोमन यांनी 'डरना जरूरी है' चित्रपटातून बॉलिवूडमध्ये पदार्पण केले. या चित्रपटात ते सैफ अली खानसोबत दिसले होते. या चित्रपटात सायको किलरची भूमिका साकारून त्यांना लोकप्रियता मिळाली. यानंतर ते 'मुन्नाभाई M.B.B.S', 'लगे रहो मुन्नाभाई', 'हे बेबी', '३ इडियट्स', 'हाऊसफुल' आणि 'जॉली एलएलबी' सारख्या अनेक हिट चित्रपटांमध्ये दिसले. आज महागड्या अभिनेत्यांच्या यादीत बोमन इराणींचे नाव सामील झाले आहे. मीडिया रिपोर्ट्सनुसार, त्यांची एकूण संपत्ती १०० कोटी रुपयांपेक्षा जास्त आहे. ६४ वर्षीय बोमन यांनी हिंदी व्यतिरिक्त तेलुगू, मराठी, कन्नड आणि मल्याळम चित्रपटांमध्येही काम केलं आहे. एका चित्रपटासाठी ते तीन ते चार कोटी रुपये घेतात. याशिवाय ब्रँड्सच्या एंडोर्समेंटसाठी ते एक कोटी रुपये फी घेतात. (सर्व फोटो: बोमन इराणी/फेसबुक व इन्स्टाग्राम)