अंबानींची धाकटी सून आहे तरी कोण? राधिका मर्चंट काय काम करते? जाणून घ्या…

रिलायन्स समुहाचे अध्यक्ष मुकेश अंबानी यांचा धाकटा मुलगा अनंत येत्या काही महिन्यांत विवाहबंधनात अडकणार आहे. अनंत व त्याची बालपणीची मैत्रीण राधिका मर्चंट यांच्या प्री-वेडिंग समारंभाची सध्या जोरदार तयारी सुरू आहे. अंबानी घराण्याची होणारी धाकटी सुनबाई नेमकी आहे तरी कोण? जाणून घेऊयात... राधिका मर्चंटचा जन्म १८ डिसेंबर १९९४ रोजी मुंबईत झाला. ती एनकोर हेल्थकेअरचे सीईओ विरेन आणि शैला मर्चंट यांची मुलगी आहे. राधिकाने तिचं शालेय शिक्षण मुंबईतील कॅथेड्रल आणि जॉन कॉनन स्कूल, इकोले मॉन्डिएल वर्ल्ड स्कूलमधून पूर्ण केलं आहे. त्यानंतर बीडी सोमानी आंतरराष्ट्रीय स्कूलमधून तिने डिप्लोमा पूर्ण केला. राधिकाच्या लिंक्डइन प्रोफाइलनुसार तिने राज्यशास्त्र व अर्थशास्त्र विषयात २०१७ मध्ये पदवी संपादन केली आहे. सध्या, ती वडिलांच्या एनकोर हेल्थकेअरमध्ये संचालक म्हणून काम पाहते. राधिका ही होणाऱ्या सासूबाई नीता अंबानी यांच्याप्रमाणे उत्तम भरतनाट्यम नृत्यांगना आहे. श्री निभा आर्ट्सच्या गुरु भावना ठाकर यांच्याकडून तिने प्रशिक्षण घेतलं आहे. २०२२ मध्ये पार पडलेल्या जिओ वर्ल्ड सेंटरमध्ये राधिकाने अरंगेत्रम हा नृत्यप्रकार सादर केला होता. या नृत्यात नर्तक विविध प्रकारच्या भावना व्यक्त करण्यासाठी हात आणि डोळ्यांच्या नजाकतीचा वापर करतात. दरम्यान, गेल्यावर्षी अनंत व राधिकाचा साखरपुडा थाटामाटात पार पडला होता. आता १ मार्च २०२४पासून अनंत-राधिकाच्या प्री-वेडिंग कार्यक्रमांना सुरुवात होणार आहे. हे कार्यक्रम ३ मार्चपर्यंत चालणार आहेत. ( फोटो सौजन्य : radhikamerchant_ इन्स्टाग्राम )