Ganeshotsav 2024: स्टार प्रवाहच्या कलाकारांनी ‘असे’ केले गणरायाचं स्वागत; पाहा कार्यक्रमातील खास फोटो

गणपती बाप्पाच्या आगमनासाठी आता अवघे काही दिवस उरले आहेत. भक्तीमय वातावरणाने भारावून टाकणारे हे १० दिवस वर्षभर पुरेल इतकी ऊर्जा आणि नवचैतन्य देऊन जातात. लाडक्या बाप्पाचा हा उत्सव जल्लोषात साजरा करण्यासाठी स्टार प्रवाहचा संपूर्ण परिवार सज्ज आहे. मराठी परंपरा मराठी प्रवाह हे ब्रीदवाक्य सार्थ ठरवणाऱ्या स्टार प्रवाह वाहिनीने प्रेक्षकांच्या अभिरुचीचा मान ठेवत नेहमीच दर्जेदार कलाकृती सादर केल्या आहेत. स्टार प्रवाह परिवार गणेशोत्सव २०२४ (Star Pravah Ganeshotsav 2024) या गणपती विशेष कार्यक्रमातून यंदा उलगडणार आहे खजिना बाप्पाच्या गोष्टींचा (Khajina Bappachya Goshtincha). कधीही न ऐकलेल्या आणि पाहिलेल्या बाप्पाच्या गोष्टी स्टार प्रवाह गणेशोत्सव २०२४ (Ganeshotsav 2024) कार्यक्रमातून नृत्यनाटिकेच्या रुपात आपल्यासमोर उलगडतील. स्टार प्रवाह परिवारातले जवळपास १०० कलाकार आपल्या कलेच्या माध्यमातून गणरायाचा उत्सव साजरा करणार आहेत. या गणपती विशेष कार्यक्रमाच्या सूत्रसंचालनाची जबाबदारी पार पाडलीय 'थोडं तुझं आणि थोडं माझं' मालिकेतील मानसी आणि तेजस म्हणजेच समीर परांजपे आणि शिवानी सुर्वे यांनी. तर सुप्रसिद्ध अभिनेत्री निर्मिती सावंत आणि लोकप्रिय अभिनेता पुष्कर श्रोत्री यांनी देखिल आपल्या खुमासदार सादरीकरणाने या कार्यक्रमाची रंगत वाढवली आहे. स्टार प्रवाहचा धिंगाणेबाज कलाकार अर्थातच सिद्धार्थ जाधवने देखिल कलाकारांसोबत धिंगाणा घालत जल्लोष केला आहे. हा कार्यक्रम प्रेक्षकांना रविवार, १ सप्टेंबर रोजी सायंकाळी ७ वाजता पाहता येणार आहे. (सर्व फोटो सौजन्य : स्टार प्रवाह/इन्स्टाग्राम) (हेही पाहा : 'तुला शिकवीन चांगलाच धडा' फेम अभिनेत्रीचा काळ्या डिझायनर साडीतील लूक)