इराणी पदार्थ, व्हिंटेज थीम अन्…; मृणाल दुसानिसचं नवीन रेस्टॉरंट पाहिलंत का? ‘Belly Laughs’ नाव का ठेवलं?

मराठी टेलिव्हिजन विश्वातील लोकप्रिय अभिनेत्री म्हणून मृणाल दुसानिसला ओळखलं जातं. तिचा चाहतावर्ग मोठ्या प्रमाणात आहे. यावर्षी मार्च महिन्यात मृणाल आपला पती नीरज मोरे आणि लेक नुर्वी यांच्याबरोबर ४ वर्षांनी भारतात परतली. भारतात आल्यावर मृणालने आपल्या नवऱ्याच्या साथीने नवा व्यवसाय सुरू केला आहे. तिने हॉटेल क्षेत्रात पदार्पण केलं आहे. मृणालने ठाण्यात 'बेली लाफ्स' ( Belly Laughs ) हे तिचं नवीन रेस्टॉरंट सुरू केलं असून नुकताच या हॉटेलचा उद्घाटन सोहळा पार पडला. यानिमित्ताने तिच्या हॉटेलला भेट देण्यासाठी मनोरंजन विश्वातील बहुतांश कलाकार पोहोचले होते. आपलं पोट भरलं, जेवून आपण तृप्त झालो की सगळ्या गोष्टी छान होतात. असा विचार करून आम्ही आमच्या रेस्टॉरंटला Belly Laughs Bistro & Tap असं नाव दिल्याचं यावेळी मृणालने सांगितलं. मृणाल व नीरज या दोघांनी इंटिरियर डिझायनरच्या मदतीने त्यांचं संपूर्ण हॉटेल व्हिंटेज लूकमध्ये सजवलं आहे. प्रशस्त जागा, पदार्थांना इराणी टच, लक्षवेधी इंटिरियर यामुळे अभिनेत्रीच्या रेस्टॉरंटमध्ये एक सुंदर Vibe तयार होत असल्याचं फोटो पाहून लक्षात येतं. आता मृणाल मालिकांमध्ये काम करून आपल्या नवऱ्याच्या साथीने हा नवीन व्यवसाय सांभाळणार आहे. ( फोटो सौजन्य : मृणाल दुसानिस व नीरज मोरे यांचं अधिकृत इन्स्टाग्राम अकाऊंट )