“माझ्या बाळाला…”, कार्तिकी गायकवाडच्या लेकाचा पहिला वाढदिवस! शेअर केले सुंदर फोटो, मुलाचं नाव काय ठेवलंय?

‘सारेगमप लिटिल चॅम्प्स’ फेम कार्तिकी गायकवाडच्या मुलाचा आज पहिला वाढदिवस आहे. यानिमित्ताने गायिकेने खास पोस्ट शेअर करत आपल्या भावना व्यक्त केल्या आहेत. २०२० मध्ये कार्तिकीने रोनित पिसेशी लग्नगाठ बांधली. गेल्यावर्षी तिच्या घरी चिमुकल्या पाहुण्याचं आगमन झालं. आज कार्तिकीच्या लाडक्या लेकाचा पहिला वाढदिवस आहे. कार्तिकी गायकवाडने पती अन् चिमुकल्या लेकासह खास फोटोशूट केलं आहे. कार्तिकीने तिच्या बाळाचं नाव रिशांक असं ठेवलं आहे. Introducing ‘रिशांक कार्तिकी रोनित पिसे’ असं कॅप्शन देत कार्तिकीने तिच्या लेकाचं नाव आणि त्याचे गोंडस फोटो सर्व चाहत्यांबरोबर शेअर केले आहेत. रिशांकला वाढदिवसाच्या शुभेच्छा देताना कार्तिकी लिहिते, "माझ्या आयुष्याला पूर्णत्व देणाऱ्या माझ्या बाळाला रिशांकला वाढदिवसाच्या खूप खूप शुभेच्छा" "बाळा तुला उदंड आयुष्य, आरोग्य, आनंद लाभो आणि तुझ्याकडून देवाची, देशाची, धर्माची सेवा घडो हीच माऊलींच्या चरणी प्रार्थना" असं कार्तिकीने तिच्या पोस्टमध्ये म्हटलं आहे. कार्तिकीच्या चाहत्यांनी देखील रिशांकवर पहिल्या वाढदिवसानिमित्त शुभेच्छांचा वर्षाव केला आहे. अनेकांनी बाळ सेम टू सेम कार्तिकीसारखं दिसतंय असंही कमेंट्समध्ये म्हटलं आहे. ( सर्व फोटो सौजन्य : @studio__9_pune__ Bhosari, Pune आणि कार्तिकी गायकवाड इन्स्टाग्राम )