मराठमोळा लूक, सुंदर मंगळसूत्र…; ‘असा’ पार पडला कार्तिकी गायकवाडच्या भावाचा लग्नसोहळा! पाहा फोटो…

‘सारेगमप लिटिल चॅम्प्स’ फेम लोकप्रिय गायिका कार्तिकी गायकवाडचा भाऊ कौस्तुभ गायकवाड अलीकडेच लग्नबंधनात अडकला. कौस्तुभच्या लग्नसोहळ्यातील फोटो कार्तिकीने नुकतेच सोशल मीडियावर शेअर केले आहेत. त्याच्या पत्नीचं नाव काव्या असं आहे. कार्तिकीने या दोघांच्या लग्नाचे फोटो शेअर करत याला, "कौस्तुभ-काव्याची सप्तपदी" असं कॅप्शन दिलं आहे. कौस्तुभ आणि काव्या यांनी लग्नसोहळ्यात मराठमोळा लूक केल्याचं पाहायला मिळत आहे. नऊवारी साडी, हातात हिरव्या बांगड्यांचा चुडा, दागिने, भांगेत कुंकू या लूकमध्ये कौस्तुभची पत्नी काव्या खूपच सुंदर दिसत आहे. एका फोटोमध्ये कार्तिकी परंपरेनुसार काव्याच्या पायात जोडवी घालत असल्याचं पाहायला मिळत आहे. याशिवाय काव्याच्या मंगळसूत्राच्या साध्या अन् सुंदर डिझाइनची देखील सर्वत्र चर्चा होत आहे. कार्तिकीने भावाच्या लग्नाचे फोटो शेअर करताच सध्या संपूर्ण कलाविश्वातून कौस्तुभ-काव्यावर शुभेच्छांचा वर्षाव करण्यात येत आहे. दरम्यान, कौस्तुभच्या वर्कफ्रंटबद्दल सांगायचं झालं, तर त्याने आजवर अनेक गाजलेली गाणी गायली आहेत. कौस्तुभचं २०१७ मध्ये प्रदर्शित झालेल्या ‘बॉईज’ चित्रपटातील ‘लग्नाळू’ गाणं सर्वत्र तुफान व्हायरल झालं होतं. ( सर्व फोटो सौजन्य : कार्तिकी गायकवाड इन्स्टाग्राम )