Happy Birthday अहो! ‘देवमाणूस’ फेम किरण गायकवाडच्या वाढदिवसानिमित्त पत्नीची खास पोस्ट, तिने ‘या’ मालिकांमध्ये केलंय काम

‘देवमाणूस-मधला अध्याय’ ही नवीन मालिका 'झी मराठी' वाहिनीवर २ जूनला प्रेक्षकांच्या भेटीला आली. ‘देवमाणूस’चे यापूर्वीचे दोन्ही सीझन सुपरहिट ठरले होते. या मालिकेत अभिनेता किरण गायकवाड प्रमुख भूमिका साकारत आहे. ‘लागिरं झालं जी’, ‘देवमाणूस’ या मालिकांमुळे अभिनेता किरण गायकवाड घराघरांत लोकप्रिय झाला. आज ( १२ जून ) किरणचा वाढदिवस आहे. यानिमित्ताने त्याच्या पत्नीने खास पोस्ट शेअर करत त्याला शुभेच्छा दिल्या आहेत. किरणबरोबर रोमँटिक फोटो शेअर करत वैष्णवीने याला "Happy Birthday अहो" असं कॅप्शन दिलं आहे. १४ डिसेंबर २०२४ रोजी किरणने अभिनेत्री वैष्णवी कल्याणकरशी लग्नगाठ बांधून आयुष्याच्या नव्या प्रवासाला सुरुवात केली. कोकणात मोठ्या थाटामाटात दोघांचा लग्नसोहळा पार पडला होता. किरण-वैष्णवीच्या लग्नाला मालिकाविश्वातील बरेच कलाकार उपस्थित होते. किरण आणि वैष्णवी यांनी एकत्र ‘देवमाणूस २’ या मालिकेत काम केलं होतं. याचवेळी दोघांची पहिली भेट झाली होती. याशिवाय वैष्णवीने 'तिकळी', 'तू चाल पुढं' या मालिकांमध्येही महत्त्वपूर्ण भूमिका साकारल्या आहेत. आज वाढदिवसानिमित्त संपूर्ण कलाविश्वातून किरण गायकवाडवर शुभेच्छांचा वर्षाव करण्यात येत आहे. ( सर्व फोटो सौजन्य : किरण गायकवाड व वैष्णवी कल्याणकर इन्स्टाग्राम )