“जादा खोलो मत साडी” बोलणाऱ्या विक्रेतीला हेमांगी कवीचं शांतपणे उत्तर; फोटो पोस्ट करीत सांगितला अनुभव

लोकप्रिय अभिनेत्री हेमांगी कवी हिने नुकताच बोरिवलीच्या ग्राहक संघाच्या प्रदर्शनातील साडीखरेदीचा अनुभव सोशल मीडियावर शेअर केला आहे. साडीच्या सौंदर्यापेक्षा विक्रेत्याच्या वागण्यामुळे ही खरेदी संस्मरणीय ठरली. हेमांगी कवी एका प्रदर्शनात साड्या पाहत असताना तिला एक सुंदर साडी दिसली. तिच्या डोळ्यांना आणि मेंदूला ती साडी कलमकारी (Kalamkari) प्रिंटची असल्याचे जाणवले. अभिनेत्रीने साडीच्या प्रिंटबद्दल विक्रेतीला विचारले, तेव्हा त्या महिलेने अतिशय त्रासिक मुद्रेने 'पेन कलमकारी' (Pen Kalamkari), असे उत्तर दिले. साडी अधिक व्यवस्थित पाहण्यासाठी हेमांगीने ती उघडण्याचा प्रयत्न केला, तेव्हा विक्रेतीने खेकसून 'जादा खोलो मत साडी' असे कठोरपणे सुनावले. विक्रेत्याच्या या उद्धट वागण्यामुळे हेमांगीचा राग अनावर झाला; पण तिने स्वतःला शांत ठेवले. रागावर नियंत्रण ठेवून तिने शांतपणे त्या साडीची किंमत विचारली. विक्रेतीने साडीची किंमत '१२०० रुपये' सांगताच, हेमांगीने कोणताही विचार न करता लगेच 'पॅक कर दो', असे सांगितले. हेमांगीच्या या त्वरित खरेदीच्या निर्णयामुळे ती 'खडूस' विक्रेती क्षणभर स्तब्ध झाली आणि तिने पटकन साडी पॅक करून दिली. विक्रेत्या महिलेने 'पेन कलमकारी' सांगितले असले तरी किंमत ऐकल्यावर हेमांगीची खात्री झाली की, ती साडी खरी हँड पेंटेड कलमकारी नसून, ब्लॉक प्रिंटेड आहे. साडी शुद्ध कॉटनची होती आणि तिचा रंगसंगती व डिझाईन खूप छान होती. त्यामुळेच हेमांगीने ती साडी तिच्या कलेक्शनसाठी 'कलमकारीसारखी दिसणारी' साडी म्हणून खरेदी केली. साडीखरेदीचे अनुभव नेहमीच छान नसतात. कधी कधी असेही अनुभव येतात, असे म्हणत हेमांगीने या प्रसंगाला पूर्णविराम दिला. (सर्व फोटो सौजन्य : हेमांगी कवी/इन्स्टाग्राम)