russia ukraine war 2022 know about the indians who are popular in russians information photos | Photos : 'या' भारतीयांनी रशियन लोकांना पाडली भुरळ; कुठे उभारला पुतळा तर शहरातील चौकाला दिलं भारतीयाचं नाव

रशिया-युक्रेन युद्धाची संपूर्ण जगभरात चर्चा सुरु आहे. रशियाने युक्रेनविरुद्ध पुकारलेल्या युद्धाला काही ठिकाणांहून पाठींबा तर अनेकांकडून तीव्र विरोध दर्शवला जात आहे. युद्धामुळे रशिया सर्वत्र चर्चेचा विषय बनला आहे. पण असेही काही भारतीय आहेत ज्यांनी आपल्या कर्तृत्वामुळे रशियन लोकांच्या मनात आपलं स्थान निर्माण केलं. राज कपूर : आपल्या अभिनय कौशल्याने ४० ते ६०च्या दशकात चित्रपटसृष्टीवर अधिराज्य गाजवणारा अभिनेता म्हणजे राज कपूर. राज कपूर यांनी एक सो एक हिट चित्रपट देऊन प्रेक्षकांच्या मनात स्थान निर्माण केलं. त्यांचे केवळ भारतातच नाही तर जगभरात लाखो चाहते आहेत. रशियातही राज कपूर यांचे चाहते आहेत. 'श्री ४२०' हा त्यांचा चित्रपट रशियात देखील प्रदर्शित करण्यात आला होता. या चित्रपटाला रशियन प्रेक्षकांकडून भरभरून प्रेम मिळालं होतं. महात्मा गांधी : राष्ट्रपिता महात्मा गांधींच्या विचारांचे अनुसरण जगभरातील लोकांकडून केले जाते. महात्मा गांधींच्या विचाराने प्रेरित झालेले लोक रशियातही आहेत. रशियाची राजधानी असलेल्या मॉस्को शहरात गांधीजींचा पुतळा देखील आहे. १९८८ साली महात्मा गांधींचा पुतळा मॉस्को शहरात उभारण्यात आला होता. पंडित जवाहरलाल नेहरू : भारताचे पहिले पंतप्रधान पंडित जवाहरलाल नेहरू यांनी त्यांच्या काळात रशियासोबत चांगले संबंध प्रस्थापित केले होते. मॉस्को शहरातील एका चौकाला पंडित जवाहरलाल नेहरूंचे नाव देण्यात आले आहे. सत्य साई बाबा : अध्यात्मिक गुरु म्हणून ओळखले जाणारे दिवंगत सत्य साई बाबा यांचे काही रशियन नागरिकही अनुकरण करतात. रशियातील अनेक शहरांमध्ये सत्य साई बाबा यांचे अध्यात्मिक केंद्र आहेत. देशातील सत्य साई बाबा यांचे अध्यात्मिक केंद्र असलेल्या पुत्तरपट्टी येथे देखील अनेक रशियन नागरिक येत असतात. येथे रशियन क्वार्टरही आहेत. ऐश्वर्या राय बच्चन : १९९४ मध्ये विश्वसुंदरी राहिलेल्या अभिनेत्री ऐश्वर्या राय बच्चनच्या सौंदर्याचे जगभरात लाखो चाहते आहेत. ऐश्वर्या राय बच्चनने सौंदर्य आणि अभिनयाने रशियन नागरिकांनाही भुरळ पाडली आहे. रशियामध्ये बुद्धिबळ या खेळाला विशेष महत्त्व आहे. बुद्धिबळपट्टू विश्वनाथन आनंदचे देखील रशियामध्ये लाखो चाहते आहेत. याशिवाय रवींद्रनाथ टागोर आणि जुबीन मेहता या भारतीयांनीही रशियन लोकांना भुरळ पाडली आहे. (सर्व फोटो : इंडियन एक्सप्रेस)