“तुम्हावर केली मी मर्जी बहाल…”; बालगंधर्व रंगमंदिर पाडण्याविरोधत कलावंताचे लावणी सादर करत आंदोलन

पुण्यातील बालगंधर्व रंगमंदिराच्या पुनर्विकासाच्या नावाखाली बालगंधर्व रंगमंदिर पाडण्यावर अखेर शिक्कामोर्तब झाले आहे. बालगंधर्व रंगमंदिराची सध्याची वास्तू पाडून तेथे नाट्यसंकुल उभारण्यात येणार असून तीन विविध आसनक्षमतेची नाट्यगृहे, तीन कलादालने, खुला रंगमंच आणि उपाहारगृह बांधण्याचे नियोजित आहे. उपमुख्यमंत्री, पालकमंत्री अजित पवार यांनीही या नव्या प्रस्तावाला सहमती दर्शविल्याने येत्या काही दिवसांत प्रत्यक्ष काम सुरू होण्याची शक्यता आहे. याविरोधात आता कलाकार आक्रमक झाले असून त्यांनी या प्रकल्पाला विरोध दर्शवला आहे. गुरुवारी पुण्यातील बालगंधर्व रंगमंदिर बचाव समितीमार्फत घंटा नाद आंदोलन करण्यात आले कलाकारांकडून यावेळी लावणीही सादर करण्यात आली. यावेळी जेष्ठ अभिनेत्री रजनी भट आणि जयमाला इनामदार, उपाध्यक्ष विजय पटवर्धन, सुनील महाजन, शशी कोठावळे, योगेश सुपेकर, जितेंद्र वाईकर, शोभा कुलकर्णी, किरण गुजर आदी कलाकार उपस्थित होते. अखिल भारतीय मराठी नाट्य परिषदेचे अध्यक्ष मेघराज राजे भोसले यांनी यावेळी या निर्णया विरोधात आक्रमक भूमिका घेतली. ज्यावेळी बालगंधर्वच्या कामाबाबत चर्चा झाली त्यावेळी १० कोटींचा खर्च होता. तो आता ११० कोटीवर घेऊन गेले आहेत. यामध्ये नेमकं काही तरी वेगळं दिसत आहे, असे मेघराज राजे भोसले म्हणाले. याचे कशा प्रकारे काम होईल, आमच्या कलाकार मंडळींसाठी पर्यायी जागा कोणती असणार, तिथे प्रेक्षक येईल का असे अनेक प्रश्न आमच्या समोर आहेत, असेही भोसले म्हणाले हे सर्व प्रश्न लक्षात घेता ही वास्तू पाडू नये, अन्यथा आम्ही अधिक तीव्र आंदोलन करू, असा इशारा मेघराज राजे भोसले यांनी यावेळी दिला. कलावंतांनी यावेळी लावणी सादर करत आंदोलन केले (फोटो सौजन्य - सागर कासार)