Photos : ठाणेकरांना वाहतूक कोंडीचा फटका ; रिक्षा आणि बससाठी लागताय रांगा

ठाणे जिल्ह्यातील महामार्गांवर होणाऱ्या वाहतूक कोंडीचा परिणाम अंतर्गत वाहतूकीवरही होऊ लागला असून या कोंडीमध्ये बस आणि रिक्षा अडकून पडत आहेत. यामुळे थांब्यांवर पुरेशा बसगाड्या आणि रिक्षा उपलब्ध होत नसल्याचे चित्र आहे. त्याचा फटका सकाळी कामावर जाणाऱ्या आणि सायंकाळी कामावरून घरी परतणाऱ्यांना बसत आहे. या प्रवाशांच्या रिक्षा आणि बस थांब्यांवर लांब रांगा लागत असल्याचे चित्र दिसून येते. तसेच आसपासच्या शहरातून ठाणे शहरात दररोज कामासाठी येणाऱ्यांना रिक्षा आणि बसगाड्या उपलब्ध होत नसून त्यांना थांब्यावरील रांगेत ताटकळत उभे रहावे लागते. सॅटीस पूलावरील बसथांब्यावर आणि पुलाखाली रिक्षा थांब्यावर प्रवाशांच्या लांब रांगा लागत आहेत. यामुळे प्रवाशांचे २० ते २५ मिनीटे वाया जात आहेत वाहने वेळेवर उपलब्ध होत नसल्याने त्यांना कामावर जाण्यासाठी दररोज उशीर होत आहे. घोडबंदरच्या दिशेने वाहतूक करणाऱ्या टीएमटीच्या बसगाड्यांच्या थांब्यांवर प्रवाशांच्या रांगामध्ये वाढ होत आहे. खड्ड्यांमुळे वाहने संथगती चालवली जात असल्याने कल्याण-शिळफाटा रस्त्यावर प्रचंड वाहतूक कोंडी होते. वाहनांच्या लांबलचक रांगा लागत असल्याने . या भागातील शाळकरी विद्यार्थ्यांना आता कोंडीचा फटका बसू लागल्याने पालक, शिक्षक हैराण आहेत. काटई नाका ते शिळफाटा चौक, काटई-बदलापूर काटई नाका, मानपाडापर्यंत वाहनांच्या रांगा दिसतात. सकाळच्या वेळी शाळेत जाणाऱ्या विद्यार्थ्यांना या वाहतूक कोंडीतून मार्ग काढत शाळा गाठावी लागते. यामुळे विद्यार्थ्यांसोबतच पालकवर्गाला देखील मोठा मनस्ताप सहन करावा लागतो. कल्याण अहमदनगर महामार्गावर मोठ्या प्रमाणावर खड्डे पडले आहेत. कल्याणहून अहमदनगरकडे जाणाऱ्या रस्त्यावर म्हारळ गावापासून थेट कांबा गावापर्यंत वाहतूक कोंडी दिसून येते. असंख्य वाहने तासनतास रस्त्यावर खोळंबलेली दिसतात. गेल्या काही दिवसात सततच्या पडणाऱ्या पावसामुळे खड्डे मोठे झाले असून येथून वाहनांना प्रवास करणे जिकरीचे झाले आहे.