Photos : दहीहंडी राम कदमांची पण चर्चा मात्र सोमय्यांची, तिसऱ्या थरावर चढून फोडली हंडी, ढोल-ताशा वाजवला अन् गाण्यावरही थिरकले

भाजपा आमदार राम कदम यांची घाटकोपरमधील दहीहंडी दरवर्षी चर्चेचा विषय असते. यंदाही अनेक दिग्गज राजकीय नेते सहभागी झाल्याने राम कदम यांच्या दहीहंडीची जोरदार चर्चा आहे. या सर्व राजकीय नेत्यांमध्ये भाजपाचे माजी खासदार किरीट सोमय्या यांची उपस्थिती दिवसभर जोरदार चर्चेत आहे. किरीट सोमय्या केवळ दहीहंडी कार्यक्रमात सहभागी झाले नाही, तर स्वतः तीन थराच्या दहीहंडीवर चढले आणि हंडी फोडली. किरीट सोमय्या यांनी हंडी फोडताच उपस्थितांमध्ये जोरदार जल्लोष दिसला. स्वतः आमदार रामदास कदम यांनीही सोमय्या यांच्या या उत्साहाचं कौतुक केलं. तसेच सोमय्यांच्या या सहभागासाठी त्यांचे आभार मानले. यावेळी किरीट सोमय्या यांनी आपण मुंबई महानगरपालिकेच्या भ्रष्टाचाराची हंडी फोडत असल्याचं म्हणत शिवसेनेवर निशाणा साधला. हंडी फोडल्यानंतर तेथे उपस्थित गोविंदांनी सोमय्यांना खांद्यावर घेत स्टेजकडे नेलं. स्टेजवर आल्यानंतर किरीट सोमय्यांनी ढोल पथकासोबत ढोलही वाजवला. ढोल पथकातील महिला सदस्यांना प्रोत्साहन देत त्यांनी त्यांच्यासोबतही ढोल वाजवला. तीन थर चढून हंडी फोडल्यानंतर सोमय्यांनी ज्या उत्साहाने डोल वाजवला ते पाहून उपस्थितांनी त्यांना चांगलीच दाद दिली. ढोल वाजवताना सोमय्यांनी पथकाच्या सदस्यांप्रमाणेच ठेका धरला आणि ढोल वाजवण्याचा आनंद घेतला. स्वतः सोमय्या ढोल वाजवत असल्याने ढोल पथकाचाही उत्साह वाढलेला पाहायला मिळाला. ढोल वाजवल्यानंतर किरीट सोमय्यांनी ताशा हातात घेतला. तसेच ताशा वाजवत आपल्यातील गोविंदाची प्रचिती दिली. इतकंच नाही, तर सोमय्या ढोलच्या ताशावर थिरकले देखील. सोमय्या थिरकत असताना ढोल पथकांनेही त्यांना जोरदार प्रतिसाद दिला. सोमय्यांचा हा उत्साह पाहून राम कदम यांनी त्यांचा हात उंचावून कौतूक केलं. एकूणच राम कदम यांच्या या दहीहंडीत सोमय्यांची जोरदार चर्चा झाल्याचं पाहायला मिळालं. सोमय्यांच्या उत्साहाचं जोरदार कौतुकही झालं. (सर्व फोटो सौजन्य : राम कदम दहीहंडी लाईव्ह)