ganeshotsav-2022 lagbaug-cha-raja-visarjan-anant-chaturdashi-ganpati-visarjan-mumbai-girgaon-chaupati

राज्यातील गणपती विसर्जन मिरवणुका या कायमच चर्चेत असतात. यंदा दोन वर्षांनंतर निर्बंधमुक्त गणेशोत्सव मोठ्या जल्लोषात पार पडला. त्यातून मुंबईच्या लाल बागच्या राजाचा थाट काही निराळाच असतो. दरवर्षी या लाडक्या बाप्पाच्या विसर्जनासाठी जगभरातून लाखो भाविक येत असतात. . दरवर्षी लालबागच्या राजाचं दर्शन घेण्यासाठी सेलिब्रिटीपासून, नेतेमंडळी मोठ्या प्रमाणात हजेरी लावतात. १० दिवसाच्या उत्सवानंतर गिरगाव चौपाटीवर लालबाग राजाचं विसर्जन करण्यात आलं. लाडक्या बाप्पाला निरोप देण्यासाठी गिरगाव चौपाटीवर भक्तांनी मोठी गर्दी केली होती. २३ तासांच्या मिरवणुकीनंतर लालबाग राजाला निरोप देण्यात आला. सकाळी ६.३० च्या सुमारास लालबागचा राजा गिरगाव चौपाटीवर दाखल झाला. यांत्रिक तराफ्याच्या सहाय्यानं लालबागच्या राजाला खोल समुद्रात निरोप दिला गेला. विसर्जनापूर्वी गिरगाव चौपाटीवर लालबाग राजाची आरती करण्यात आली. समुद्राचं पाणी अंगावर उडवत आणि बोटींच्या माध्यमातून लालबागच्या राजाला मानवंदना देण्यात आली. मुंबईत रात्री उशीरापर्यंत गणेश विसर्जनाच्या मिरवणुका सुरु होत्या. लालबाग राजासह गिरगाव चौपाटीवर अनेक गणपतींचं विसर्जन पार पडलं भर पावसातही गणेश भक्तांचा उत्साह कायम असल्याचे दिसून आले. पुढच्या वर्षी लवकर येण्याचं आश्वासन घेत आणि आपल्या बाप्पाचं साजिरं रुप डोळ्यात साठवत लालबागच्या राजाला निरोप देण्यात आला.