PHOTOS : जुन्या पेन्शनसाठी शासकीय कर्मचाऱ्यांचा बेमुदत संप; अनेक सरकारी कार्यालयांना टाळं, कामकाज ठप्प; आरोग्य सेवेवरही परिणाम!

जुन्या पेन्शन योजनेवरून महाराष्ट्रातील शासकीय व निमशासकीय कर्मचारी आक्रमक झाले आहेत. राज्यातील १७ लाख सरकारी कर्मचाऱ्यांनी आजपासून बेमुदत संप पुकारला आहे. शासकीय अधिकारी व कर्मचाऱ्यांनी पुकारलेल्या या बेमुदत संपामुळे स्थानिक पातळीवरील शासकीय कार्यालये ओस पडली आहेत. राज्यातील अनेक ठिकाणी या कर्मचाऱ्यांनी आपल्या मागण्यासाठी काळी फीत बांधून आंदोलनं केली. राज्यात नेमकी काय परिस्थिती आहे. जाणून घेऊन या. कोल्हापूर जिल्ह्यातील ८० हजार कर्मचारी संपात सहभागी झाल्याचा दावा करण्यात येत आहे. या संपाला प्रतिसाद मिळाल्याने शासकीय कार्यालय अधिकारी, कर्मचाऱ्यांअभावी कार्यालये ओस पडली आहेत. मात्र, अत्यावश्यक सेवा सुरू आहेत. आज कोल्हापुरातील टाऊन हॉल बाग येथे सकाळी ११ वाजता सरकारी कर्मचाऱ्यांकडून रॅली काढण्यात आली. पुण्यातील शासकीय कर्मचाऱ्यांनी आज आंदोलनात सहभाग घेतला. पिंपरी चिंचवड महापालिकाही कर्मचारी या संपात सहभागी झाले होते. त्यांनी महापालिका मुख्यालयासमोर आंदोलन केले. पिंपरी-चिंचवड महापालिकेतील तीन हजार कर्मचारी आज संपावर होते. तसेच प्रादेशिक परिवहन कार्यालयाच्या (आरटीओ) पुणे विभागाच्या वतीने मंगळवारी काम बंद आंदोलन करण्यात आले रायगड जिल्ह्यातही आज १५ हजार कर्मचारी संपात सहभाग घेतला. त्यामुळे जिल्ह्यातील शासकीय कार्यालयात शुकशुकाट बघायला मिळाला. छत्रपती संभाजीनगरमध्येही आज जुनी पेन्शन योजना लागू करण्याच्या मागणीसाठी शासकीय वैद्यकीय रुग्णालयातील परिचारिकांनी संपात सहभाग घेतला होता. त्यामुळे रुग्णांची काही प्रमाणात गैरसोय झाल्याचं बघायला मिळालं. तसेच या परिचारिकांनी मेट्रन ऑफिससमोर एकत्र येत सरकार विरोधात जोरदार घोषणाबाजी केली. पालघरमधील सुमारे सात हजार जिल्हा परिषद कर्मचारी व पाच हजार महसूल कर्मचारी व शिक्षक संपात सहभागी झाले होते. नाशिकमध्येही महापालिकेसह इतर शासकीय कार्यालयातील एकूण २५ हजार कर्मचारी संपात सहभागी झाले होते. त्यामुळे कोट्यवधींचे शासकीय व्यवहार ठप्प झाल्याचं बघायला मिळालं. यावेळी स्थानिक पातळीवरील शासकीय कार्यालये, जिल्हा परिषदेतील कामकाज विस्कळीत झाले होते.