PHOTOS: दिवाळीसाठी बाजारपेठ्या सजल्या; आकर्षक आकाशकंदील, पणत्यांच्या घरेदीसाठी ग्राहकांची लगबग

घराघरात दिवाळीसाठी लगबग सुरू झाली आहे. दिव्यांच्या या सणासाठी बाजारदेखील सजले आहेत. मुंबईच्या माहिममध्ये कागदांनी बनलेल्या आकाशकंदीलांची विक्री करण्यात येत आहे. विविध रगांच्या आकर्षक कंदीलांनी ग्राहकांची पावले या दुकानांकडे वळत आहेत. कंदीलांच्या खरेदीसाठी ग्राहकांनी दुकानांमध्ये गर्दी केली आहे. प्रकाश आणि मांगल्याचा दीपोत्सव अवघ्या काही दिवसांवर येऊन ठेपला आहे. या सणासाठी आकाशकंदील, पणत्या, रोषणाईच्या माळ्या, दाराच्या रंगीबेरंगी तोरणांनी बाजार फुलला आहे. कागदाने बनवलेल्या आकाशकंदीलाला बाजारपेठेत मोठी मागणी आहे. चायनीज आकाशकंदीलाचीही ग्राहकांना भुरळ पडली आहे. चिनी मातीच्या पणत्यांनीही बाजार सजला आहे. यावरील आकर्षक नक्षीकाम आणि रंगांची सजावट ग्राहकांचे लक्ष वेधून घेत आहेत. महागाईचा फटका दिवाळीलाही बसला आहे. आकाशकंदील, पणत्यांसह इतर साहित्यांच्या दरांमध्ये यंदा १० टक्क्यांची वाढ झालेली आहे. दिवाळीच्या आगमनाने नागरिकांमध्ये उत्साहाचे वातावरण आहे. यंदा ग्राहकांकडून समाधानकारक खरेदी झाल्यास दोन वर्षांचे नुकसान भरून निघण्याची दुकानदारांना आशा आहे. दोन वर्ष करोना प्रादुर्भावामुळे दिवाळी साध्या पद्धतीने साजरी करण्यात आली. यंदा दिवाळी निर्बंधमुक्त असल्याने नागरिकांमध्ये उत्साह बघायला मिळत आहे. दिवाळीत कपडे, सोने, घरगुती इलेक्ट्रिक, इलेक्ट्रॉनिक्स वस्तू यासह अन्य खरेदीकडे नागरिकांचा चांगला कल आहे. (फोटो सौजन्य- गणेश शिरसेकर, एक्स्प्रेस)