Anand Mahindra: “हे फार काळ टीकणार नाही”, चीन-अमेरिका व्यापार युद्धादरम्यान आनंद महिंद्रांची पोस्ट व्हायरल

महिंद्रा ग्रुपचे अध्यक्ष आनंद महिंद्रा यांनी एक्सवर एका पोस्टमध्ये जगातील १० सर्वात मोठ्या निर्यातदारांची यादी असलेले इन्फोग्राफिक शेअर केले आहे. मेकॅनिकल इंजिनिअरिंग वर्ल्डने तयार केलेल्या या व्हिज्युअलमध्ये चीन, अमेरिका आणि जर्मनी हे तीन अव्वल निर्यातदार देश असल्याचे दाखवले आहे. त्यानंतर जपान, यूके, फ्रान्स आणि भारत सारखे देश आहेत. यावेळी महिंद्रा यांनी आकडेवारीसह बॉब डिलनच्या "द टाईम्स दे आर अ-चेंजिन" या प्रतिष्ठित गीताचा उल्लेख केला आहे. महिंद्रा यांनी जागतिक व्यापाराच्या बदलत्या ट्रेंडकडे लक्ष वेधले आणि निर्यात वर्चस्वाचा सध्याचा क्रम फार काळ टिकणार नाही असे संकेत दिले आहेत. पोस्टमध्ये महिंद्रा म्हटले की, "या चार्टवर नीट नजर टाका. कारण क्रम तुमच्या कल्पनेपेक्षा जास्त वेगाने बदलणार आहे." अमेरिकेचे अध्यक्ष डोनाल्ड ट्रम्प यांच्या प्रशासनाच्या आयात शुल्क लादण्याच्या निर्णयांमुळे जागतिक मंदीची भीती पुन्हा निर्माण झाली आहे, अशा वेळी महिंद्रा यांची ही पोस्ट व्हायरल होत आहे. राष्ट्राध्यक्ष ट्रम्प यांनी या आठवड्यात अनेक देशांवरील उच्च आयात शुल्क स्थगित केले असताना, त्यांनी गेल्या आठवड्यात लागू केलेले १० टक्के सार्वत्रिक आयात शुल्क कायम ठेवले आहे. दरम्यान ट्रम्प यांनी चीनविरोधात कठोर पाऊले उचलली आहेत. जगातील दुसऱ्या क्रमांकाची सर्वात मोठी अर्थव्यवस्था असलेल्या चीनच्या वस्तूंवर त्यांनी १४५ टक्के कर लावला आहे. या प्रत्युत्तर म्हणून चीनने शुक्रवारी अमेरिकन वस्तूंवर १२५ टक्के कर लावला.