‘गोवा ट्रिप’ची क्रेझ कायम; २०२५ मध्ये ५० लाख पर्यटकांची गोव्यास भेट

गोवा पर्यटन विभागाने जाहीर केलेल्या आकडेवारीनुसार, २०२५ च्या पहिल्या सहामाहीत गोव्यात ५४.५५ लाख पर्यटकांचे आगमन झाले, ज्यामध्ये देशांतर्गत पर्यटकांचा वाटा ५१.८४ लाख होता. उर्वरित २.७१ लाख पर्यटक आंतरराष्ट्रीय पर्यटक होते. जानेवारी २०२५ मध्ये गोव्याला सर्वाधिक १०.५६ लाख पर्यटकांनी भेट दिली आहे. ज्यामध्ये ९.८६ लाख देशांतर्गत आणि जवळजवळ ७०,००० परदेशी पर्यटकांचा समावेश होता. त्यानंतर फेब्रुवारीमध्ये ९.०५ लाख पर्यटक आले, ज्यामध्ये ८.४४ लाख देशांतर्गत आणि ६१,००० हून अधिक आंतरराष्ट्रीय पर्यटक होते. मार्चमध्ये ८.८९ लाख पर्यटकांनी गोव्याला भेट दिली. ज्यामध्ये ८.३२ लाख भारतातील आणि सुमारे ५६,००० परदेशातून आले असल्याची माहिती पर्यटन विभागाने दिली. उन्हाळ्याच्या महिन्यांतही पर्यटकांचा हा ट्रेंड कायम राहिला. एप्रिलमध्ये, गोव्यात ८.४२ लाख पर्यटक गेले होते, ज्यात ८.१४ लाख देशांतर्गत आणि २८,००० आंतरराष्ट्रीय पर्यटक होते. त्यानंतर मे महिन्यात ९.२७ लाख पर्यटकांनी गोव्याला भेट दिली. ज्यात ८.९७ लाख देशांतर्गत आणि जवळजवळ ३०,००० परदेशी पर्यटक होते. जूनमध्ये एकूण ८.३४ लाख पर्यटकांची नोंद झाली, ज्यामध्ये ८.०८ लाख देशांतर्गत आणि सुमारे २५,००० आंतरराष्ट्रीय पर्यटक होते, अशी माहिती गोव्याच्या पर्यटन विभागाने दिली आहे. २०२५ च्या पहिल्या सहामाहीत गोव्यात पर्यटकांच्या संख्येचा आलेख उल्लेखनीय उंचीवर पोहोचला आहे, ज्यामुळे देशांतर्गत आणि आंतरराष्ट्रीय अशा दोन्ही पर्यटकांच्या आगमनात विक्रमी वाढ झाली आहे. यामुळे भारतातील सर्वात पसंतीच्या आणि विकसित होणाऱ्या पर्यटन स्थळांपैकी एक म्हणून गोव्याचा दर्जा आणखी मजबूत झाला आहे, असे गोवा पर्यटन विभागाच्या निवेदनात नमूद केले आहे.