Photos: वडापाव खाण्याची स्पर्धा ते नात्यातील कडवटपणा; ‘अशी’ आहे सचिन अन् विनोदच्या मैत्रीची गोष्ट

"सचिन माझा चांगला मित्र आहे. त्याने माझी खूप मदत केली आहे पण, मी त्याच्याकडून फार अपेक्षा नाही ठेवू शकत", असे विनोद कांबळी म्हणाला आहे. यावरून सचिन तेंडुलकर आणि विनोद आजही एकमेकांना चांगले मित्र मानत असल्याचे दिसते. वयाच्या दहाव्या वर्षी शारदाश्रम विद्यामंदिर शाळेपासून सचिन आणि विनोदच्या मैत्रीची सुरुवात झाली होती. दोघांनी रमाकांत आचरेकर यांच्याकडून क्रिकेटचे प्रशिक्षण घेतले. असे म्हटले जाते की दोघेही शाळेत असताना वडापाव खाण्याची स्पर्धा करायचे. 'हॅरिस शील्ड टूर्नामेंट' स्पर्धेत दोघांनी विक्रमी ६६४ धावांची भागीदारी केली होती. त्यानंतर दोघांनाही आंतरराष्ट्रीय क्रिकेटमध्ये संधी मिळाली. २००० मध्ये दोघांच्या मैत्रीमध्ये दरी निर्माण झाल्याचे वृत्त आले होते. मात्र, पुस्तक प्रकाशन सोहळा आणि आचरेकर सरांच्या अंत्यविधीदरम्यान दोघांची मैत्री शाबुत असल्याचे दिसले. (सर्व फोटो इंडियन एक्सप्रेसवरून साभार)