ठाण्यातील आठ वर्षांच्या चिमुरडीने यशस्वीरीत्या पार केला ५३६४ मीटर उंचीवरील एव्हरेस्ट बेस कॅम्पचा ट्रेक

जगातील सर्वांत उंच आणि कठीणातील कठीण असलेला माउंट एव्हरेस्ट बेस कॅम्प (५३६४ मीटर) ठाण्यातील आठ वर्षीय गृहिता विचारे या छोट्या हिरकणीने यशस्वीरित्या सर केला आहे. गृहिताच्या वडिलांना यांना गिर्यारोहणाची आवड असल्याने ते मोठ्या गिर्यारोहण गटाबरोबर विविध किल्ले, शिखरावर जातात. इतक्या लहान वयातील तिच्या या कामगिरीचे सर्वच स्तरातून तिचे कौतुक केले जात आहे. काही महिन्यांपूर्वीच गृहिताने नऊवारी साडी नेसून नवरा-नवरी हे कठीण सुळके सर केले होते. याबद्दल तिला इंडिया बूक ॲाफ रेकाॅर्डने सन्मानित करण्यात आले होते. गृहिता ही राज्यातील पहिली सर्वात लहानगी आहे, जिने हे बेस कॅम्प ट्रेक पूर्ण केले आहे. तर देशात ती दुसरी आहे. हरिता विचारे तिची मोठी बहीण ही सुद्धा गिर्यारोहणाचा एक भाग होती . हा ट्रेक करण्यापूर्वी महिनाभर गृहीताकडून जिने चढणे-उतरणे , शनिवार-रविवारी डोंगर चढणे-उतरणे करणे असे व्यायाम करून घेण्यात आले. तापमान , थंडगार वारा , उंच चढण अशी अनेक आव्हाने गृहितासमोर होती. मात्र तिने ती सहजपणे पार केली. काहीही झाले तरी ते उंच टोक गाठायचं म्हणजे गाठायचच अशी जिद्द उराशी बाळगून गृहिताने ती उंची गाठण्याचे यश संपादन केले.