Akshaya Tritiya 2025: पुण्याच्या श्रीमंत दगडूशेठ हलवाई गणपती मंदिरात ११ हजार आंब्यांचा महानैवेद्य

साडेतीन मुहूर्तांपैकी एक असलेल्या अक्षय्य तृतीयेच्या (Akshaya Tritiya) मुहूर्तावर श्रीमंत दगडूशेठ हलवाई गणपती मंदिरात (Shreemant Dagadusheth Halwai Ganpati Pune) बुधवारी आंब्यांची सजावट करण्यात आली होती. देसाई बंधू आंबेवाले यांच्या वतीने गणरायाला ११ हजार आंब्यांचा नैवेद्य अर्पण करण्यात आला. अक्षय्य तृतीया, 'आंबा महोत्सव'निमित्त बाप्पांच्या मंदिरास आकर्षक फुलांची सजावट करण्यात आली आहे. झेंडूच्या फुलांनी साकारलेल्या आब्यांनो मंदिराची सजावट आणि आंब्यांनी सजलेले गणरायाचे मनोहारी रूप भाविकांनी डोळ्यांमध्ये साठवून घेतले आणि मोबाईलमध्ये बंदिस्त केले. आंबा महोत्सवनिमित्त बाप्पांना आंब्यांच्या रसाचा अभिषेक करण्यात आला. भाविकांची दर्शनासाठी गर्दी झाली होती. मंदिरात पहाटे गायिका वेदश्री खाडिलकर-ओक व सहकारी यांनी स्वराभिषेक सादर केला. सजावटीतील हे आंबे वंचित घटकातील मुले, वृद्धाश्रमातील ज्येष्ठ नागरिक आणि ससून रुग्णालयातील रुग्णांना प्रसाद म्हणून देण्यात येणार आहेत, असे ट्रस्टचे कोषाध्यक्ष महेश सूर्यवंशी यांनी सांगितले. पौराणिक ग्रंथांनुसार, अक्षय्य तृतीयेच्या दिवशीच श्री विष्णूंचा सहाव्या परशुराम अवताराचा जन्म झाला होता, तसेच या दिवशी देवी गंगादेखील पृथ्वीवर अवतरली होती. (सर्व फोटो सौजन्य : श्रीमंत दगडूशेठ हलवाई गणपती फेसबुक पेज)