गोविंदांना ५ टक्के आरक्षण देण्यामागील सूत्र उदय सामंतांनी समजावून सांगितलं; MPSC च्या विद्यार्थ्यांचा उल्लेख करत म्हणाले, “दहीहंडी…”

दहीहंडीला ‘साहसी खेळा’चा दर्जा दिल्यामुळे हा खेळ ऑलंपिकमध्ये पोहोचेल असा विश्वास राज्याचे उद्योगमंत्री उदय सामंत यांनी व्यक्त केला आहे. दहीहंडीच्या माध्यमातून देशाचे नाव जागतिक पातळीवर जाईल, असा दावा सामंत यांनी यावेळी बोलताना केला. दहीहंडीला साहसी खेळाचा दर्जा देऊन त्यासाठी सरकारी नोकऱ्यांत आरक्षण देण्याच्या एकनाथ शिंदे- फडणवीस सरकारच्या निर्णयावर राज्यभरातून टीकेची झोड उठली आहे. क्रीडा, राजकीय, सामाजिक अशा सर्वच क्षेत्रांतून या निर्णयास विरोध होत आहे. त्यामुळे कोंडीत सापडलेल्या सरकारच्या विशेषत: मुख्यमंत्री एकनाथ शिंदे यांच्या बचावासाठी उदय सामंत आणि आमदार प्रताप सरनाईक पुढे आले. दहीहंडी फोडणाऱ्या गोंविंदासाठी नोकरीत आरक्षण जाहीर करण्यात आल्याने काहींचा गैरसमज झाला आहे, असं सामंत म्हणाले आहेत. सर्वोच्च न्यायालय आणि केंद्र सरकार यांच्या मार्गदर्शक सूचनांचा अभ्यास करून दहीहंडी या खेळाबाबतची नियमावली तयार केली जाणार आहे, असं सामंत म्हणाले. क्रीडा क्षेत्रातील तज्ज्ञ व्यक्तींशी चर्चा करून क्रीडा खाते तयार करणार आहे, असंही त्यांनी शिंदे सरकारच्या या निर्णयाबद्दल बोलताना स्पष्ट केलं आहे. दहीहंडीसंदर्भात ही नियमावली तयार करताना वयोगट, शिक्षण, विभाग, राज्य, राष्ट्रीय स्तरावरील स्पर्धा याचा विचार करण्यात येईल, असंही त्यांनी सांगितलं आहे. त्यामुळे शिक्षण आणि अन्य निकष पूर्ण करणाऱ्या गोविंदाना अन्य खेळाडूंप्रमाणे नोकरी मिळेल असेही सामंत यांनी शिंदे सरकारची बाजू मांडताना यावेळी स्पष्ट केले. या खेळासाठी पाच टक्के आरक्षण दिलेले नाही तर खेळाडूंसाठी जे पाच टक्के आरक्षण आहे, त्यात कबड्डी, खोखोप्रमाणेच दहीहंडीचा समावेश करण्यात येणार आहे, असंही सामंत यांनी शिंदे-फडणवीस सरकारच्या निर्णयाच्या बाजूने बोलताना स्पष्ट केलं. त्यामुळे खेळाडू आणि राज्य लोकसेवा आयोगाची परीक्षा देणाऱ्यांवर कोणताही अन्याय होणार नसल्याचेही शिंदे सरकारमध्ये मंत्री असणाऱ्या सामंत यांनी सांगितले.