PHOTOS : ज्यांनी पाकिस्तानला नमवलं त्या श्रीलंकेच्या विजयवीरांना ‘हे’ मिळालं बक्षिस; तुम्हीही थक्क व्हाल

आशिया कपच्या फायनलमध्ये श्रीलंकेने पाकिस्तानचा २३ धावांनी पराभव करत विजय मिळवला. श्रीलंकेने आशिया कपवर सहाव्यांदा नाव कोरले. वानिंदू हसरंगाची (३६ धावा व तीन बळी) अष्टपैलू चमक, डावखुऱ्या भानुका राजपक्षेची (नाबाद ७१) अप्रतिम खेळी आणि प्रमोद मदूशानच्या (चार बळी) भेदक माऱ्याच्या जोरावर श्रीलंकेने विजय मिळवला. श्रीलंकेने पाकिस्तानसमोर १७१ धावांचे आव्हान ठेवले. लंकेच्या १७१ धावांच्या आव्हानाचा पाठलाग करताना पाकिस्तानचा डाव १४७ धावांत संपुष्टात आला. या विजयासाठी श्रीलंकेला मोठी बक्षीस रक्कम मिळाली आहे. बीसीसीआयचे अध्यक्ष सौरव गांगुली यांनी १.५ लाख डॉलर्सचा धनादेश कर्णधार दासुन शनाकाकडे सुपूर्द केला. यासोबतच 'प्लेअर ऑफ द मॅच' आणि 'प्लेअर ऑफ द सिरीज'सह अनेक खेळाडूंना बक्षीस मिळाले आहेत. श्रीलंकेने फायनलमध्ये पाकिस्तानचा पराभव केल्यानंतर संघाला १.५ लाख डॉलरचा चेक देण्यात आला. भारतीय रुपयानुसार १.२ कोटी इतकी रक्कम आहे. वानिंदू हसरंगा याला 'प्लेअर ऑफ द सिरीज' म्हणून गौरविण्यात आले आहे. त्याला १५ हजार डॉलरचा धनादेश देण्यात आला. भारतीय रुपयानुसार हे सुमारे १२ लाख रुपये आहे. भानुका राजपक्षेला अंतिम सामन्यासाठी 'प्लेअर ऑफ द मॅच' म्हणून गौरविण्यात आले. राजपक्षे यांना ५ हजार डॉलर्सचा धनादेश देण्यात आला. भारतीय रुपयानुसार हे सुमारे ३ लाख ९८ हजार रुपये आहे. तर सामन्यातील सर्वोत्तम झेलसाठी ३ हजार डॉलर्सचा धनादेश देण्यात आला. भारतीय रुपयानुसार हे सुमारे २ लाख ३९ हजार रुपये आहे. पाकला बक्षीस म्हणून ७५वहजार डॉलर (सुमारे ६० लाख रुपये) देण्यात आले आहे.