PM Shinzo Abe’s funeral : शिंजो आबेंना श्रद्धांजली वाहताना पंतप्रधान नरेंद्र मोदी भावूक; पाहा Photos

जपानचे माजी पंतप्रधान शिंजो आबे यांच्यावर टोकियोतील निप्पॉन बुडोकान कम्युनिटी सेंटरमध्ये शासकीय इतमामात अंत्यसंस्कार करण्यात आले. अंत्यसंस्कारासाठी पंतप्रधान नरेंद्र मोदी, अमेरिकेच्या उपराष्ट्रपती कमला हॅरिस, ऑस्ट्रेलियाचे पंतप्रधान अँथनी अल्बानीज यांच्यासह जगभरातील दिग्गज नेते उपस्थित होते. जपानच्या नारा शहरातील प्रचारसभेदरम्यान आबे यांची ८ जुलैला गोळ्या झाडून हत्या करण्यात आली होती. यानंतर त्यांच्या पार्थिवावर १५ जुलैला अंत्यसंस्कार करण्यात आले होते. आबे यांच्या सन्मानार्थ भारताने ९ जुलै रोजी राष्ट्रीय शोकही जाहीर केला. त्यानंतर शिंजो आबेंवर जपान सरकारकडून आज शासकीय इतमामात अंत्यसंस्कार करण्यात आले. आज पंतप्रधान मोदींनी जपानचे पंतप्रधान फुमियो किशिदा यांचीही भेट घेतली. त्यांनी आपल्या ट्विटमध्ये लिहिले आहे की, पंतप्रधान किशिदा यांच्यासोबत फलदायी भेट झाली आहे. यावेळी त्यांनी विविध द्विपक्षीय विषयांवर चर्चा केली. तसेच, माजी पंतप्रधान शिंजो आबे यांच्या दुःखद निधनाबद्दल पंतप्रधान नरेंद्र मोदी यांनी शोक व्यक्त केला. पंतप्रधान मोदी पुढे म्हणाले की, 'मी मागच्या वेळी आलो होतो तेव्हा माजी पंतप्रधान शिंजो आबे यांच्याशी अनेक तास चर्चा केली होती.' संपूर्ण भारत आबेंची आठवण करत असल्याचे मोदी म्हणाले. पंतप्रधान मोदी म्हणाले की, जागतिक प्रभाव निर्माण करण्यात भारत आणि जपानच्या मैत्रीचा मोठा वाटा आहे. मला खात्री आहे की तुमच्या नेतृत्वाखाली भारत-जपान संबंध अधिक दृढ होतील. जगातील समस्या सोडवण्यासाठी आपण योग्य भूमिका बजावू शकू. द्विपक्षीय बैठकीदरम्यान, पंतप्रधान मोदी आणि फुमियो किशिदा यांच्यात दोन्ही देशांमधील संबंध अधिक दृढ करण्याच्या कल्पनांवर चर्चा झाली. यासोबतच दोन्ही नेत्यांनी अनेक प्रादेशिक आणि जागतिक मुद्द्यांवर चर्चा केली. पंतप्रधान मोदी आणि आबे यांच्यात बरीच जवळीक होती. आबे यांच्या निधनावर पंतप्रधान मोदींनी भावनिक ब्लॉग लिहिला. पीएम मोदी म्हणाले, 'शिंजो आबे हे केवळ जपानचे महान व्यक्तिमत्त्व नव्हते, तर एक मोठे व्यक्तिमत्त्व असलेले जागतिक राजकारणी होते. ते भारत-जपान मैत्रीचे मोठे समर्थक होते. ते आता आपल्यात नाही याचे खूप दुःख आहे... त्यांच्या अकाली जाण्याने जपानसह संपूर्ण जगाने एक महान दूरदर्शी नेता गमावला आहे, तर मी माझा एक प्रिय मित्र गमावला आहे.' (Photos : ANI)