“..तर २६/११ चा हल्ला नाना पटोलेंनीच केला”, देवेंद्र फडणवीसांचं ‘त्या’ आरोपांवर प्रत्युत्तर

“मुकेश अंबानी यांच्या अँटिलिया या निवासस्थानासमोर स्फोटकांनी भरलेली गाडी उभी करणे, अनिल देशमुखांवर १०० कोटींच्या वसुलीचे आरोप करणे हे सगळं महाविकास आघाडीला बदनाम करण्यासाठी ठरवून केलं होतं. त्यामागे देवेंद्र फडणवीस होते मी ते विधानसभेतही म्हटलं होतं. आता ते स्पष्ट झालं आहे”, असा गंभीर आरोप नाना पटोले यांनी १६ मे रोजी केला होता. त्यावर उपमुख्यमंत्री देवेंद्र फडणवीस यांनी त्यांच्याच शब्दात प्रत्युत्तर दिलं आहे.

“नाना पटोलेंना तर अवॉर्ड दिला पाहिजे, ते म्हणाले अंबानीच्या घरापुढे स्फोटके मीच ठेवली. आता मला इच्छा झाली आपण एक स्टेटमेंट द्यावं की २६/११ दहशतवादी हल्ला नाना पटोलेंनीच केला. माझा सवाल आहे की, वाझेला पोलीस दलामध्ये परत कोणी घेतला? हा वाझे, पोलीस दलात परत येण्याकरता २०१७ साली उद्धव ठाकरेंनी माझ्याकडे पाठवला. मंत्री आले माझ्याकडे, दबाव आणला की साहेबांनी आग्रह धरला आहे. काहीही झालं तरी वाझेला पोलीस दलात परत घ्या. पण मी म्हटलं की, वाझेला मी परत घेणार नाही आणि फाईलवर लिहिलं की मी परत घेणार नाही”, असं देवेंद्र फडणवीस म्हणाले.

हेही वाचा >> “मुकेश अंबानींच्या घरासमोर स्फोटकं ठेवण्याची कल्पना फडणवीसांचीच” नाना पटोलेंचा गंभीर आरोप

“उद्धवजींचं सरकार आल्यानतंर वाझेला पोलीस दलात परत घेतलं. त्यानंतर हा वाझे कुठे असायचा? वर्षावर नाहीतर मातोश्रीवर. हा कोणाचा वाझे होता? आणि आता परमबीर सिंगांनी तुमच्यावर आरोप केले यात आमची काय चूक? परबमीर सिंगांना आयुक्त कोणी केला? ठाकरेंनी. आरोप केल्यावर काढलं कोणी? उद्धव ठाकरेंनी. वाझेच्या माध्यमातून वसुलीचं रॅकेट उघडलं. त्याच्या जबानीतून सगळं पुढे आलं, असंही फडणवीस पुढे म्हणाले.

“यांचं रॅकेट मी बाहेर काढलं नसतं, मनसूख हिरेनची हत्या मी बाहेर काढली नसती तर हे सगळं यांनी पचवून टाकलं असतं. विरोधी पक्षनेता म्हणून मनसूख हिरेनची हत्या शोधून काढली. त्यामुळे यांचं रॅकेट पुढे आलं, नाहीतर हे असेच हजारो कोटी रुपये कमावून राहिले असते, असंही फडणवीस म्हणाले. पुढे ते म्हणाले की, “पण मी नाना भाऊंचे आभार मानतो. नाना भाऊ माझा खऱा मित्र आहे. नानाभाऊला माहितेय की ही गोष्ट लोकांना विसरूच द्यायची नाही. लोकं विसरले की नानाभाऊ हा विषय काढतातच. त्यामुळे मी त्यांचे मनापासून आभार मानतो.”