महापालिकेने गेल्या पाच वर्षांत केलेली नालेसफाई, सांडपाणी वाहिन्यांची कामांबाबतची श्वेतपत्रिका जाहीर करावी आणि पुणेकरांना वेठीस धरणाऱ्या झारीतील शुक्राचार्यांची नावे जाहीर करून त्यांच्यावर गुन्हे दाखल करावेत, अशी मागणी काँग्रेस शिष्टमंडळाने महापालिका आयुक्त विक्रम कुमार यांच्याकडे गुरुवारी केली.
हेही वाचा >>>पुणे: ५० हजार रुपयांची लाच मागितल्याप्रकरणी सहाय्यक महिला पोलीस निरीक्षकासह दोघांवर गुन्हा
शहरात चार दिवसांपूर्वी झालेल्या पावसाने शहर आणि उपनगराचा भाग पाण्यात गेला. मध्यवस्ती भागातील सोसायट्या आणि उपनगरातील झोपडपट्ट्यांमध्ये पाणी शिरले. या पार्श्वभूमीवर काँग्रेसचे प्रभारी शहराध्यक्ष अरविंद शिंदे यांच्या नेतृत्वाखालील शिष्टमंडळाने महापालिका आयुक्त, प्रशासकांची भेट घेतली. राज्य प्रवक्ता गोपाळ तिवारी, माजी मंत्री उल्हास पवार, माजी शहराध्यक्ष रमेश बागवे, कमल व्यवहारे, संगीता तिवारी यांच्यासह अन्य पदाधिकारी या वेळी उपस्थित होते.
हेही वाचा >>>पुणे : खिल्लार गायींचे कळपाने संगोपन करणारे सलगरे ; एका शेतकऱ्याकडे असतो पन्नास गायींचा कळप
पाच वर्षांत भाजपने प्रशासनावर दबाव टाकून केवळ ठेकेदारांच्या हिताचे निर्णय घेतले. काम न करताना ठेकेदारांना देयके देण्यात आली. पाच वर्षांत नालेसफाई, सांडपाणी वहन व्यवस्था आणि सांडपाणी नियोजनाकडे प्रशासनाकडून दुर्लक्ष करण्यात आले तर भाजपने केवळ टक्केवारीकडे लक्ष दिले. त्यामुळे शहराची अवस्था बकाल झाली आहे. त्यामुळे या सर्व कामांची श्वेतपत्रिका काढावी, अशी मागणी करण्यात आल्याचे अरविंद शिंदे यांनी सांगितले.
नैसर्गिक आपत्ती लक्षात घेऊन कामे तातडीने करणे आवश्यक होते. मात्र लहान व्यासाच्या पावसाळी वाहिन्यांचे आणि अतिवृष्टीचे कारण आयुक्त पुढे करत आहेत. कसबा क्षेत्रीय कार्यालयाकडून चारशे कोटींची विकासकामे करण्यात आल्याचे केवळ दाखविले जात आहे, असे गोपाळ तिवारी यांनी सांगितले.