पुणे : पीएमपी प्रवासी महिलांकडील दागिने लांबविणाऱ्या चोरट्यांनी उच्छाद मांडला असून चोरट्यांनी वेगवेगळ्या घटनेत प्रवासी महिलांकडील सोन्याचे दागिने, रोकड असा दोन लाख २३ हजारांचा ऐवज लांबविला.
याबाबत प्रणाली गाढगे (वय २६, रा. राजगुरूनगर) यांनी हडपसर पोलीस ठाण्यात फिर्याद दिली आहे. प्रणाली भोसरी ते हडपसर मार्गावरील पीएमपी बसने प्रवास करत होत्या. बसमध्ये गर्दी होती. चोरट्याने प्रणाली यांच्याकडील पिशवीतून दीड लाख रुपयांचे सोन्याचे मंगळसूत्र तसेच ८०० रुपयांची रोकड असा एक लाख ५१ हजारांचा ऐवज लांबविला. हडपसर पीएमपी स्थानकात त्या बसमधून उतरल्या. तेव्हा पिशवीतून मंगळसूत्र तसेच रोकड चोरीला गेल्याचे लक्षात आले. पोलीस उपनिरीक्षक एस. जी. थोरात तपास करत आहेत.
दुसऱ्या एका घटनेत ज्येष्ठ महिलेच्या हातातील ७० हजारांची सोन्याची बांगडी चोरट्यांनी लांबविल्याची घटना घडली. तक्रारदार ज्येष्ठ महिला कोथरुड भागात राहायला आहेत. स्वारगेट पीएमपी स्थानकातून त्या बसमधून प्रवास करत होत्या. टिळक रस्त्यावरील पूरम चौकातील थांब्यावर त्या उतरल्या. चोरट्यांनी ज्येष्ठ महिलेच्या हातातील सोन्याची बांगडी लांबविली. महिलेने याबाबत स्वारगेट पोलीस ठाण्यात फिर्याद दिली असून सहायक निरीक्षक बाचवे तपास करत आहेत. शहरातील प्रमुख पीएमपी स्थानकांच्या परिसरात चोरट्यांचा सुळसुळाट झाला आहे. गर्दीच्या मार्गावरील बसमध्ये शिरुन चोरटे महिला प्रवाशांकडील ऐवज लांबवत आहेत. गेल्या काही महिन्यांपासून प्रवाशांकडील ऐवज लांबविण्याच्या घटनांमध्ये वाढ झाली आहे.