पुणे शहरात आज दिवसभरात नव्याने ६३० रुग्ण आढळून आले. त्यामुळे शहरातील एकूण रुग्णसंख्या १ लाख ५४ हजार २३० एवढी झाली. तर आज दिवसभरात २२ रुग्णांचा मृत्यू झाला. त्यामुळे आज अखेर ३ हजार ८३० रुग्णांचा मृत्यू झाला आहे.
करोनावर उपचार घेणाऱ्या १,०१० रुग्णांची तब्येत ठणठणीत असल्याने, त्या सर्वांना घरी सोडण्यात आले आहे. त्यामुळे आज अखेर १ लाख ३७ हजार ५०२ रुग्ण करोनामुक्त झाले आहेत, अशी माहिती पुणे महापालिकेच्या आरोग्य विभागाने दिली.
तर पिंपरी-चिंचवड शहरात रविवारी दिवसभरात ३६४ करोनाबाधित रुग्ण आढळले. तर २८ जणांचा मृत्यू झाला आहे. तर, ३८३ जण करोनामुक्त झाले असून त्यांना घरी सोडण्यात आले आहे. पिंपरी-चिंचवड शहरातील एकूण करोनाबाधित रुग्णांची संख्या ८३ हजार ७८५ वर पोहचली असून यांपैकी, ७८ हजार १४९ जण करोनातून बरे झाले आहेत. महापालिकेच्या रुग्णालयात उपचार घेत असलेल्या सक्रिय रुग्णांची संख्या २ हजार ६५५ एवढी आहे, अशी माहिती महापालिकेच्या आरोग्य विभागाने दिली.