तब्बल ३५० मांजरी एकाच फ्लॅटमध्ये, पुण्यातील हडपसरच्या सोसायटीतील घटना, पशू संवर्धन विभागाची नोटीस

पोलिसांनी दिलेल्या माहितीनुसार, हडपसर भागातील मार्व्हल बाउंटी को-ऑपरेटिव्ह हाऊसिंग सोसायटीमधील नवव्या मजल्यावर मागील ५ वर्षांपासुन तब्बल ३५० मांजरी पाळण्यात आल्या आहेत. या मांजरीची देखभाल करण्यास त्यांनी ५ ते ६ कामगार ठेवले आहेत. त्या मांजरीच्या विष्ठेचा, आवाजाचा मोठ्या प्रमाणावर त्रास होत आहे.याबाबत सोसायटीमधील नागरिकांनी सदनिका धारकांकडे तक्रार केली. रहिवाशांच्या तक्रारीकडे त्यांनी काही लक्ष दिले नाही.त्यावर रहिवाशांनी पुणे महापालिकेच्या अधिकाऱ्यांकडे तक्रार केल्यावर, अधिकारी घटनास्थळी दाखल झाले. पण संबधीत व्यक्तीनी त्यांना देखील कोणत्याही प्रकारचा प्रतिसाद दिला नाही. त्यावर अखेर हडपसर पोलिसांना याबाबत माहीती देण्यात आली. त्यानंतर पोलिसांनी घटनास्थळी दाखल होऊन फ्लॅटची पाहणी केली. त्यावेळी त्या फ्लॅटमध्ये ३५० मांजरी असल्याचे आढळून आले. सोसायटीमधील रहिवाशांची तक्रार लक्षात घेऊन, मांजरी पाळणार्‍या संबधीत सदनिकाधारकांना ४८ तासात मांजरी हलविण्यात यावे,याबाबतची नोटीस पुणे महापालिकेच्या पशू संवर्धन अधिकाऱ्यांकडून बजाविण्यात आली आहे.