पुणे : कौटुंबिक वादातून पत्नीचे भितींवर डोके आपटून खुनाचा प्रयत्न करण्यात आल्याची घटना धनकवडी भागात घडली. या प्रकरणी सहकारनगर पोलिसांनी पतीविरुद्ध खुनाचा प्रयत्न केल्या प्रकरणी गुन्हा दाखल केला.याप्रकरणी पतीविरुद्ध गुन्हा दाखल करण्यात आला आहे. आराेपी पती घोरपडे पेठेत राहायला आहेत. याबाबत आरोपीच्या पत्नीने सहकारनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपीचा तीन वर्षांपूर्वी तक्रारदार २४ वर्षीय तरुणीशी विवाह झाला होता. विवाहानंतर दाेघेजण घोरपडे पेठेत राहायला होते. मात्र, कौटुंबिक वादामूळे काही दिवसांपूर्वी तरुणी धनकवडीतील माहेरी निघून आली होती. तिने नांदण्यास नकार दिला होता. त्यामुळे आरोपी पती तिच्यावर चिडला होता. शनिवारी (२७ सप्टेंबर) सकाळी पती हा पत्नीच्या माहेरी आला. त्याने पत्नीला घरी नेण्यास नकार दिला. पत्नीने नांदण्यास नकार देऊन घटस्फोट घेणार असल्याचे सांगितल्याने तो चिडला.
त्यानंतर पतीने तिला मारहाण करुन भितींवर डोके आपटले. तिचा गळा दाबून जीवे मारण्याचा प्रयत्न केला. खुनाचा प्रयत्न केल्याप्रकरणी पतीविरुद्ध गुन्हा दाखल करण्यात आला आहे. सहायक पोलीस निरीक्षक विशाल पवार तपास करत आहेत.