सातारा रस्त्यावर धावत्या मोटारीला आग; मोटारचालकासह महिला त्वरीत बाहेर पडल्याने अनर्थ टळला

पुणे : धावत्या मोटारीने अचानक पेट घेतल्याची घटना पुणे-सातारा रस्त्यावरील पद्मावती परिसरात शनिवारी रात्री घडली. मोटारीतील चालक, तसेच महिला बाहेर पडल्याने अनर्थ टळला. अग्निशमन दलाच्या जवानांनी घटनास्थळी धाव घेऊन आटोक्यात आणली. मात्र, तोपर्यंत मोटार पूर्णपणे जळाली. पुणे-सातारा रस्त्यावरुन मोटार कात्रजकडे निघाली होती. पद्मावती बसथांब्याजवळ मोटारीतून धूर आल्याने चालकाने प्रसंगावधान राखून मोटार बाजूला नेली. मोटारचालक आणि महिला त्वरित बाहेर पडले. मोटारीने पेट घेतला. आग भडकल्याने घबराट उडाली. बघ्यांची गर्दी झाल्याने घबराट उडाली.  या घटनेची माहिती अग्निशमन दलाला कळविण्यात आली. जवानांनी पाण्याचा मारा करुन आग आटोक्यात आणली. मोटारीत शाॅर्टसर्किट झाल्याने आग लागल्याची शक्यता जवान सचिन शिंदे यांनी व्यक्त केली.