पुणे: एखाद्या रेल्वे प्रवाशाला तातडीची वैद्यकीय मदत आता स्थानकातच उपलब्ध होणार आहे. यासाठी पुणे रेल्वे स्थानकाच्या आवारात आपत्कालीन वैद्यकीय कक्ष उभारण्यात येत आहे. प्रवाशाची तब्येत बिघडल्यास या केंद्रात त्याच्यावर ताबडतोब प्राथमिक उपचार करून त्याला नजीकच्या सरकारी रुग्णालयात दाखल केले जाणार आहे.
पुणे रेल्वे स्थाकाच्या आवारात रेल्वे सुरक्षा दलाच्या पोलीस ठाण्याशेजारील जागेत आपत्कालीन वैद्यकीय कक्ष उभारला जाणार आहे. एकूण ५९८ चौरस फूट जागेवर हा कक्ष उभारण्यात येणार असून, तो चालविण्याचे कंत्राट रूबी हॉल रुग्णालयाला देण्यात आले आहे. हे कंत्राट पाच वर्षांसाठी देण्यात आले आहे. रेल्वे गाडीत चढताना अथवा उतरताना अथवा इतर अन्य कारणांमुळे जखमी झालेल्या प्रवाशांवर या कक्षात मोफत प्रथमोपचार केले जाणार आहेत. याचबरोबर आजारी असलेल्या प्रवाशांवर केंद्र सरकारच्या आरोग्य योजनेच्या दरांनुसार उपचार केले जातील.
आणखी वाचा-मोटारी भाड्याने देणाऱ्या कंपनीची फसवणूक…पाकिस्तानी सीमेजवळील गावात विक्री
आजारी प्रवाशावर प्रथमोपचार करून गरज भासल्यास त्याला नजीकच्या सरकारी रुग्णालयात दाखल केले जाणार आहे. प्रवाशाने खासगी रुग्णालयात दाखल व्हायची इच्छा व्यक्त केल्यास त्याला तिथे नेले जाईल. यासाठी प्रवासी अथवा त्याच्या नातेवाईकाचे संमतीपत्र घेतले जाईल. प्रवाशाला रुग्णालयात नेण्यासाठी कक्षाकडून रुग्णवाहिका मोफत पुरविली जाईल. आपत्कालीन वैद्यकीय कक्षात औषध विक्री केंद्र सुरू करून संबंधित संस्थेला उत्पन्न मिळविता येणार आहे.
असा असेल आपत्कालीन वैद्यकीय कक्ष
- आपत्कालीन कक्ष २४ तास सुरू राहणार
- कक्षात एक डॉक्टर, दोन परिचारिका
- ईसीजी, डिफ्रिबिलेटर, नेब्युलायझर आदी सुविधा
- जीवनावश्यक औषधे उपलब्ध असणार
- प्रथमोपचार मोफत तर इतर उपचार अल्प दरात
- नजीकच्या सरकारी रुग्णालयात नेण्यासाठी रुग्णवाहिका
रेल्वे प्रवाशांना आपत्कालीन वैद्यकीय मदत स्थानकावरच उपलब्ध करून देण्याचे निर्देश रेल्वे मंडळाने दिले होते. त्यानुसार, स्थानकाच्या परिसरात आपत्कालीन वैद्यकीय कक्ष उभारण्यात येत आहे. तिथे प्रवाशांना २४ तास उपचार मिळतील. -डॉ. रामदास भिसे, जनसंपर्क अधिकारी, मध्य रेल्वे (पुणे विभाग)