पिंपरी- चिंचवड: पिंपरी- चिंचवड पोलिसांनी तब्बल २३ कोटी ३० लाखांचा गांजा आणि मेफेड्रोन ड्रग्स नष्ट केले आहेत. गेल्या पाच ते सहा वर्षांपासून करण्यात आलेल्या कारवाईनंतर ६६२ किलो गांजा आणि २० किलो मेफेड्रोन जप्त करण्यात आलं होतं. एकूण ९० गुन्ह्यातील हा मुद्देमाल होता. अशी माहिती पोलीस उपायुक्त डॉ. शिवाजी पवार यांनी दिली आहे.
पिंपरी- चिंचवड शहर हे औद्योगिक नगरी मानली जाते. इथं देशातील प्रत्येक कानाकोपऱ्यातून नागरिक आपली स्वप्न घेऊन आलेला आहे. मोठ्या मोठ्या कंपनी, नामांकित शाळा, कॉलेज, विद्यालये आहेत. छोटे -मोठे उद्योग आहेत. परंतु, हीच तरुण पिढी, कामगार व्यसनाला दूर ठेऊ शकला नाही. यातील काही प्रमाणात नशेच्या आहारी देखील गेलेली आहे. कॉलेज, महाविद्यालयीन परिसरात गांजा, मेफेड्रोन विक्री केली जात असल्याचं आणि त्यांना पोलिसांनी पकडल्याचे अनेकदा प्रकरण समोर आलेलं आहे.
अशाच प्रकारे वेगवेगळ्या ९० गुन्ह्यामधील तब्बल ६६२ किलो गांजा, २० किलो मेफेड्रोन (एमडी) हे शासकीय नियमामनुसार रांजणगाव येथील कारखान्याच्या भट्टीत नष्ट करण्यात आले आहे. ही कारवाई पोलीस आयुक्त विनयकुमार चौबे यांच्या मार्गदर्शनाखाली करण्यात आली. शहरातील अवैधरित्या विकल्या जाणाऱ्या अमली पदार्थांवर पोलिसांचं विशेष लक्ष आहे. अमली पदार्थ पथकाकडून वारंवार कारवाई देखील करण्यात येत आहे.