पुणे शहराला पाणीपुरवठा करणाऱ्या खडकवासला धरणसाखळी प्रकल्पात संततधार पाऊस सुरूच आहे. त्यामुळे पाणीसाठा ३० टक्क्यांवर पोहोचला आहे. चारही धरणांच्या पाणलोट क्षेत्रात शनिवारी रात्रीपासून रविवारी सकाळपर्यंत जोरदार पावसाने हजेरी लावली.
रविवारी रात्रीपासून सोमवारी सकाळपर्यंत टेमघर धरण क्षेत्रात ७५ मिलिमीटर, वरसगाव धरण परिसरात ७४ मि.मी, पानशेत धरण परिसरात ८५ मि.मी, तर खडकवासला धरण क्षेत्रात १८ मि.मी पावसाची नोंद झाली आहे. सध्या खडकवासला धरणसाखळी प्रकल्पात ८.७० अब्ज घनफूट (टीएमसी) म्हणजेच २९.८५ टक्के पाणीसाठा जमा झाला आहे.
रविवारी रात्री चारही धरणांत ८.१९ टीएमसी पाणीसाठा होता. रविवारी रात्रीच्या तुलनेत सोमवारी सकाळी ०.५१ टीएमसीने पाणीसाठ्यात वाढ झाली आहे, असे जलसंपदा विभागाकडून सांगण्यात आले.