पुणे : शहरात झालेल्या पावसामुळे १३ ठिकाणी झाडे पडल्याची घटना घडल्या. सुदैवाने या घटनेत कोणी जखमी झाले नाही. अग्निशमन दलाच्या जवानांनी घटनास्थळी धाव घेऊन फांद्या हटवून रस्ते वाहतुकीस खुले करून दिले. शहर परिसरात मध्यरात्रीनंतर जोरदार पाऊस झाला. त्यानंतर सोमवारी दिवसभर पावसाची रिपरिप सुरू होती. मध्यरात्रीनंतर शहराच्या वेगवेगळ्या भागात झाडे, तसेच फांद्या पडण्याच्या घटना घडल्या.
सोमवारी सायंकाळपर्यंत १३ ठिकामी झाडे पडल्याची माहिती अग्निशमन दलाच्या मुख्य नियंत्रण कक्षाने दिली. प्रभात रस्ता गल्ली क्रमांक १४, पाषाण रस्त्यावरील अभिमानश्री सोसायटी, पाषाण परिसरातील सोमेश्वरवाडी, बालेवाडीतील श्री शिव छत्रपती क्रीडा संकुल, कोथरूडमधील महात्मा सोसायटी, सिंहगड रस्त्यावरील नित्यानंद हाॅल, सोमवार पेठेतील नरपतगिरी चौक, महापालिका भवन, घोरपडीतील सोपानबाग, बिबवेवाडीतील हाॅटेल रुपाली, खराडीतील ठुबेनगर, कोथरूडमधील रामबाग काॅलनी परिसरात झाड कोसळण्याच्या घटना घडल्या. सुदैवाने या घटनेत कोणी जखमी झाले नाही.
जुन्या वाड्याची भिंत कोसळली
मध्यभागातील फडके हौद चौक परिसरातील जुन्या वाड्याची भिंत कोसळण्याची घटना घडली, तसेच सिंहगड रस्त्यावरील धायरी परिसरात एक जाहिरात फलक कोसळला. अग्निशमन दलाच्या जवानांनी घटनास्थळी धाव घेऊन मदतकार्य केले.