डोंबिवली- येथील पश्चिम डोंबिवलीतील भावे सभागृहाजवळ असलेल्या शिवसेनेच्या( उद्धव बाळासाहेब ठाकरे) शाखेतील शाखाप्रमुखावर चार अनोळखी इसमांनी रविवारी संध्याकाळी हल्ला केल्याने खळबळ उडाली आहे. राजेश बाळाराम पाटील (५०) असे हल्ला झालेल्या तक्रारदार शाखाप्रमुखाचे नाव आहे. त्यांनी या संदर्भात विष्णूनगर पोलिस ठाण्यात तक्रार दाखल केली आहे.
हेही वाचा >>> गेमच्या माध्यमातून कथित धर्मांतर प्रकरण; ठाणे पोलिसांकडून एकजण ताब्यात
सेवानिवृत्त असलेले राजेश पाटील उद्धव बाळासाहेब ठाकरे पक्षाचे स्थानिक शाखाप्रमुख म्हणून काम पाहतात. रविवारी संध्याकाळच्या सुमारास राजेश पाटील शाखेत बसलेले असताना त्यांच्या शाखेसमोर वाहनांची गर्दी होती. शाखेच्या बाहेर एक अनोळखी इसम रस्त्यावर त्याच्या मोबाईलवर बोलत होता. राजेश पाटील यांनी त्याला रस्त्यावरून गाडी बाजूला घेऊन फोनवर बोल, अशी विनंती केली. या बोलण्यावर संतापलेल्या सदर इसमाने तू मला विचारणारा कोण ? असा सवाल करत शिवगाळ केली. इसम त्याच्या तीन साथीदारांना घेऊन शाखे जवळ आला. या चौघांनी मिळून शाखाप्रमुख राजेश पाटील यांना लाथा-बुक्क्यांनी बेदम मारहाण केली. त्यानंतर त्यांचे कपडे फाडून टाकले. या मारहाणीत शाखाप्रमुख राजेश पाटील यांच्या पायाला दुखापत झाली आहे. मारहाण केल्यानंतर हल्लेखोर पळून गेले. विष्णूनगर पोलीस त्यांचा शोध घेत आहेत.